अमरावती: गणणेसाठी जंगलात केल्या जाणाऱ्या 'निसर्ग अनुभव' या खास कार्यक्रमाच्या माध्यमातून वन्यजीव प्रेमींना अख्खी रात्र घनदाट जंगलात मचानावर बसून काढण्याचा अनुभव घेता येतो. अनेक वर्षांपासून वन विभागाच्या वतीने हे आयोजन केले जात आहे.
वन्यजीवप्रेमींसाठी आनंददायक अनुभव: बुद्ध पौर्णिमेच्या रात्री जंगलात प्राणी गणना करण्यासाठी वनविभागाच्या वतीने वन्यजीव प्रेमींसाठी जंगलात खास मचानांची व्यवस्था केली जाते. गतवर्षीपर्यंत साडेसातशे ते बाराशे रुपये शुल्क आकारून वन्यजीव प्रेमींना 'निसर्ग अनुभव' या उपक्रमात सहभागी होण्याची संधी मिळायची. पहिल्या दिवशीचे आणि रात्रीचे जेवण तसेच दुसऱ्या दिवशी सकाळचा नाश्ता वनविभागाच्या वतीने उपलब्ध करून दिला जायचा. जंगलातील मचानावर दोन वन्यजीव प्रेमींसह वन विभागाचा एक कर्मचारी असे तिघेजण रात्रभर राहू शकेल, अशी व्यवस्था असायची. पानवट्याजवळ उभारण्यात येणाऱ्या या मचानावरून रात्रीच्या अंधारात कोणकोणते प्राणी पानवट्यावर येतात त्याची नोंद वन्यजीव प्रेमींना करावी लागते. त्यांच्यासाठी हा संपूर्ण अनुभव थरारक आणि अतिशय आनंदाचा असतो. विशेष म्हणजे, मेळघाटात महाराष्ट्रात सर्व दुरून वन्यजीवप्रेमी 'निसर्ग अनुभव' या उपक्रमात सहभागी होतात.
यावर्षी असे आहेत 'बोर्डिंग पॉईंट': 'निसर्ग अनुभव' या उपक्रमांतर्गत मेळघाट व्याघ्र प्रकल्प अंतर्गत सिपना, अकोट, गुगामल, मेळघाट, अकोला आणि पांढरकवडा या सहा वन्यजीव विभागात बोर्डिंग पॉईंट निश्चित करण्यात आले आहेत. ऑनलाइन आरक्षणासाठी 132 मचानांची व्यवस्था असून 'व्हीआयपी'साठी 24 मचान आरक्षित ठेवण्यात आले आहेत.
चिरोडी-पोहराच्या जंगलाकडे दुर्लक्ष: अमरावती विभागात एकूण पाच ठिकाणी निसर्ग अनुभवासाठी 'बोर्डिंग पॉईंट' निश्चित करण्यात आले असताना अमरावती शहरालगत असणाऱ्या चिरोडी आणि पोहरा येथील घनदाट जंगलात 'निसर्ग अनुभवा'साठी कुठलीही व्यवस्था करण्यात आलेली नाही. या जंगलात 6च्या वर बिबट आणि मोठ्या संख्येत नीलगाय, सांबर, हरीण यासह अनेक वन्यजीव तसेच पक्षी आहेत. अतिशय समृद्ध असणारे हे जंगल वन्यजीव प्रेमींना नेहमीच आकर्षित करते; मात्र वनविभागाच्या उदासीन धोरणामुळे चिरोडी आणि पोराच्या जंगलात निसर्ग अनुभवाचे आयोजन करण्यात येत नसल्याबाबत निसर्गप्रेमींनी रोष व्यक्त केला आहे.
'निसर्ग अनुभवा'वर पावसाचे सावट: यंदा आयोजित 'निसर्ग अनुभव' या कार्यक्रमावर पावसाचे सावट दिसत आहे. यामुळे ज्या वन्यजीव प्रेमींनी मचानासाठी 'ऑनलाइन बुकिंग' केले, ते आता रद्द करणार की काय? अशी शंका वाटायला लागली आहे. हवामान विभागाने 5 मे पर्यंत पावसाचा अंदाज वर्तविला आहे. बुद्ध पौर्णिमेच्या रात्री चंद्र ढगांमध्ये लपला तर वन्यप्राणी गणना अशक्य आहे. तसेच वादळी पाऊस आला तर वन्यजीव प्रेमींसाठी जंगलात जाणे धोक्याचे ठरू शकते, अशी भीती देखील व्यक्त केली जात आहे.
