जनतेच्या समस्यांसाठी आमदार देवेंद्र भुयारांचा राहुटी उपक्रम; हजारो तक्रारींचा निपटारा एकाच छताखाली

मतदारसंघातील सर्वसामान्य लोकांच्या छोट्या मोठ्या शासकीय कामाचा तात्काळ निपटारा व्हावा, यासाठी आमदार देवेंद्र भुयार यांनी मोर्शी वरुड मतदारसंघात राहुटी उपक्रम सुरू केला आहे. या उपक्रमांतर्गत आमदार आपल्या दारी हा कार्यक्रम राबविला जात आहे. याअंतर्गत विविध सरकारी योजनांची माहिती नागरिकांना करण्यात येत आहे.

अमरावती - आपल्या मतदारसंघातील सर्वसामान्य लोकांच्या छोट्या मोठ्या शासकीय कामाचा तात्काळ निपटारा व्हावा, यासाठी आमदार देवेंद्र भुयार यांनी मोर्शी वरुड मतदारसंघात राहुटी उपक्रम सुरू केला आहे. या उपक्रमांतर्गत आमदार आपल्या दारी हा कार्यक्रम राबविला जात आहे. या राहुटी उपक्रमात आमदार देवेंद्र भुयार यांच्यासह सर्व प्रशासकीय अधिकारी उपस्थित राहून सर्वसामान्य नागरिकांच्या रखडलेल्या कामाचा निपटारा करत आहे.

ग्रामीण भागातील अडचणी सोडवण्यासाठी आमदार आपल्या दारी हे अभियान राबवण्यात येत असून या अभियाना अंतर्गत आमदार आमदार देवेंद्र भुयार स्वतः ग्रामीण भागात जाऊन तेथील जनतेच्या समस्या जाणून घेत आहेत व त्या सर्व समस्या जागेवरच कशा सोडवता येतील त्यादृष्टीने संबंधित अधिकाऱ्यांना आदेश देत आहेत. या अभियानामुळे ग्रामीण भागातील हजारो नागरिकांच्या समस्या या काही मिनिटातच सुटत असल्याने ग्रामीण भागातील नागरिक देखील आता समाधान व्यक्त करताना पाहायला मिळत आहेत.

आमदार देवेंद्र भुयार यांच्या संकल्पनेतून आमदार आपल्या दारी उपक्रम वरुड तालुक्यातील विविध गावात राबविण्यात येत आहे. मोर्शी विधानसभा मतदार संघामध्ये हा उपक्रम राबविण्यात येत असून, वरुड तालुक्यात टेंभुरखेडा येथे आयोजित आमदार आपल्या दारी उपक्रमाचा टेंभुरखेडा, तिवासाघाट, गव्हाणकुंड, इसंबरी, बहादा, भेमडी, झटामझिरी, पिंपळशेंडा, गव्हानकुंड, इसंबरी, बहादा, येथील ग्रामस्थांनी लाभ घेतला. या उपक्रमाच्या माध्यमातून गावातील नागरिकांच्या महावितरण, ग्राम विकास व महसूल विभागाचे संबंधित असलेल्या सर्व अडचणी कशा सोडवता येतील यासाठी या राहुटीत भर दिला जात आहे.प्रामुख्याने ग्रामीण भागातील वृद्ध नागरिकांच्या संजय गांधी निराधार योजना व श्रावण बाळ योजनेच्या अडचणी मागील अनेक वर्षांपासून प्रलंबित होत्या. या सर्व अडचणी आता काही क्षणातच मार्गी लागत आहेत आणि यामुळे निराधारांना दिलासा मिळत आहे. जनतेला केंद्रबिंदू म्हणून आमदार देवेंद्र भुयार यांनी ही नवीन मोहीम हाती घेतली आहे. त्या मोहिमेमुळे आता अनेक वर्षांपासून रखडलेले प्रश्न तात्काळ मार्गी लागत आहेत. लवकरच मोर्शी विधानसभा मतदारसंघातील जिल्हा परिषद गट आणि गणनिहाय सर्व गावांना आमदार स्वतः भेटी देऊन त्यांचे प्रश्न गावात बसूनच मार्गी लावणार असून आता छोट्या छोट्या कामांसाठी वृद्ध नागरिकांना शहरात येण्याची आवश्यकता भासणार नाही आणि हेच या मोहिमेमागची भावना असल्याचे आमदार देवेंद्र भुयार यांनी सांगितले.विविध योजनांची नागरिकांना माहिती -श्रावणबाळ, संजय गांधी निराधार योजना, महसूल विभाग, सामाजिक वनीकरण विभाग, कृषी, महिला व बालकल्याण विभाग, भूमी अभिलेख विभाग, आरोग्य विभाग, जिल्हा ग्रामीण विकास यंत्रणा, समाजकल्याण, सिंचन, लघु पाटबंधारे, महावितरण, पुरवठा, पशुसंवर्धन, आरोग्य, कामगार कल्याण, परिवहन विभाग आदी विविध विभागांच्या दालनातून नागरिकांना योजनांची माहिती देण्यात आली व त्यांच्या समस्यांचे निराकरण करण्यात आले. आमदार आपल्या दारी उपक्रमाच्या ठिकाणी नागरिकांना त्यांचा अर्ज दाखल करण्यासाठी लेखन कक्ष, अर्जवाटप कक्षाची सुविधा, दिव्यांग नागरिक, महिला, ज्येष्ठ नागरिक, युवक, युवती आदी शेकडो नागरिकांनी उपक्रमाचा लाभ घेतला. आधारकार्ड, जेष्ठ नागरिक स्मार्ट कार्ड, पोखरा अंतर्गत राबविण्यात येणाऱ्या योजना यासह विविध विभागाचे अर्ज स्वीकारण्यासाठी स्वतंत्र कक्ष उपलब्ध करून देण्यात आले होते.