अमरावती - सध्या पर्यावरणाचा समतोल राखण्यासाठी मोठ्या प्रमाणावर वृक्ष लागवडीसाठी जनजागृती केली जात आहे. त्यानुसार झाडे देखील लावली जातात. मात्र, त्यानंतर त्या झाडांकडे दुर्लक्ष झालेले पाहायला मिळते. मात्र, अमरावतीतील ९ वर्षीय चिमुकली त्याला अपवाद ठरली आहे. दरवर्षी ती तिच्या वाढदिवसाला शहरात विविध ठिकाणी झाडे लावते. एवढेच नाहीतर त्या झाडांवर लक्ष सुद्धा ठेवते. त्यामुळे तिचे सर्वत्र कौतुक केले जात आहे.
क्षमता संतोष ठाकूर, असे या चिमुकलीचे नाव आहे. शहरातील होली क्लास या शाळेत चौथ्या वर्गात शिकते. क्षमताच्या कुटुंबाची परिस्थिती जेमतेमच आहे. मात्र, तिचे बाबा संतोष ठाकूर सामाजिक कार्यात नेहमी समोर असतात. त्यामुळे त्यांनी स्वतः क्षमताच्या पहिल्या वाढदिवसानिमित्त एक झाड लावले होते. त्यानंतर दुसऱ्या वाढदिवसाला दोन झाडे लावली. असे प्रत्येक वाढदिवसाला झाडांचा संख्या वाढवत गेले. आता क्षमता मोठी झाली. त्यामुळे ती स्वतः झाडांची काळजी घेते. दररोज शाळेत जाताना ती झाडाला पाणी टाकायला विसरत नाही. त्यामुळे सामाजिक कार्यकर्ते अण्णा हजारे, योगगुरू रामदेव बाबा, दिल्लीचे मुख्यमंत्री अरविंद केजरीवाल, किरण बेदी, सिंधुताई सपकाळ आदींनी तिच्या या कार्याचे कौतुक केले आहे.
प्रत्येकाने झाडे लावल्यास चांगला पाऊस येईल. त्यामुळे शेतकरी सुखावेल, असे क्षमता सांगते. तिचे वडील प्रत्येक कार्यात तिच्यासोबत असतात. पंतप्रधान नरेंद्र मोदी यांच्या मन की बात या प्रसिद्ध कार्यक्रमासाठी क्षमताचा प्रस्तावही त्यांनी पंतप्रधान कार्यालयात पाठवला आहे. फक्त फोटो काढण्यासाठी झाडे लावणाऱ्यांनी तिच्याकडून नक्कीच आदर्श घ्यावा. तसेच प्रत्येकाने आपल्या वाढदिवसानिमित्त किमान दोन ते चार झाडे लावल्यास नक्कीच पर्यावरणाचे रक्षण होईल.
पूरग्रस्तांसाठी पाठवली होती मदत -
सांगली, कोल्हापुरातील महापुरात उद्ध्वस्त झालेल्या कुटुंबीयांसाठी देखील तिने मदत पाठवली होती. पूरग्रस्त भागातील विद्यार्थ्यांना वही, पुस्तके, पेन असे साहित्य दिले होते. तिच्या कार्यामुळे अमरावतीकरांनी प्रेरित होऊन शालेय साहित्य आणून दिले.
