जिल्हा ग्रामीण रुग्णालयातील कोविड योद्धा उपेक्षित; जिल्हाधिकारी कार्यालयावर धडक

आरोग्य कर्मचाऱ्यांनी विविध मागण्यांसाठी जिल्हाधिकारी कार्यालयावर मोर्चा नेत आंदोलन करण्यात आले होते. या आदोलकांनी कोरोना काळात लढा देत असताना देखील वेतन वेळवेर न मिळाल्याचा आरोप केला आहे.

अमरावती - कोरोना काळात जिवाची पर्वा न करता 24 तास सेवा देणाऱ्या अमरावती जिल्हा सामान्य रुग्णालयातील वैद्यकीय अधिकारी, कर्मचारी यांचे वेतन वेळेवर होत नाही. त्यामुळे वेतन आणि इतर समस्यांसाठी या आरोग्यसेवकांनी अमरावती जिल्हाधिकारी शैलेश नवाल यांच्याकडे धाव घेत आंदोलन केले. वैद्यकीय कर्मचाऱ्यांना वेतन वेळवर मिळावे. तसेच दर महिन्याचे वेतन 5 तारखेच्या आत मिळावे. तसेच सातव्या वेतन आयोगाचा प्रथम हप्ता देण्यात यावा, या मागण्या यावेळी करण्यात आल्या. कोरोनामध्ये सेवा देऊनही शासनाने दुर्लक्ष केले असल्याचा आरोप यावेळी आरोग्य कर्मचाऱ्यांनी केला.

यापूर्वी दिले होते निवेदन-राज्यात कोरोनाचा प्रादुर्भाव झाला तेव्हापासून आरोग्य कर्मचारी जिवाची पर्वा न करता कोरोना रुग्णांना सेवा देत आहे. परंतू अनेक कर्मचाऱ्यांना त्यांचा कामाचा मोबदला वेळेवर मिळत नाही. यासंदर्भात याआधी या कर्मचारी यांनी जिल्हा शल्य चिकित्सक डॉ. श्यामसुंदर निकम यांना निवेदन दिले होते. पण काहीच तोडगा न निघाल्याने अखेर शुक्रवारी या कर्मचाऱ्यांनी जिल्ह्याधिकारी कार्यालयावर धडक दिली.पाच तारखेच्या आत वेतन देण्यात यावे-

दर महिन्यात या कर्मचाऱ्यांचे वेतन हे २० तारखेला होते. परंतु हे वेतन ५ तारखेला मिळावे, तसेच सातव्या वेतन आयोगानुसार नुसार कर्मचारी यांना वेतन देण्यात यावे. आदी मागण्या या आरोग्य कर्मचारी यांच्या आहेत.