अमरावती - अमरावती महापालिकेतील अधिकारी आणि कर्मचाऱ्यांच्या बनावट स्वाक्षरी घेऊन वैयक्तिक शौचालय बांधून देण्याचा प्रकरण समोर आले आहे. यातून महापालिकेला चक्क 75 लाख रुपयांचा चुना लावण्याचा प्रयत्न झाल्याने खळबळ उडाली आहे. हा प्रकार महापालिका आयुक्तांच्या वेळीच लक्षात आल्याने या प्रकरणाची तक्रार आता शहर कोतवाली पोलीस ठाण्यात नोंदविण्यात आली आहे. पोलिसांनी या प्रकरणात गुन्हा दाखल केला आहे.
स्वच्छ भारत अभियान आणि स्वच्छ महाराष्ट्र अभियानाअंतर्गत शहरी भागात हगणदारी मुक्त करण्यासाठी शासनाकडून वैयक्तिक शौचालय बांधून देण्यात आले. 2014-15 मध्ये राबविण्यात आलेल्या या अभियाना अंतर्गत ज्या व्यक्तींकडे शौचालय नाही, अशा व्यक्तींना शासनाकडून 12 हजार रुपये आणि महापालिकेकडून 5 हजार रुपये असे एकूण 17 हजार रुपये देऊन नागरिकांना वैयक्तिक शौचालय बांधण्यास आर्थिक मदत देण्यात आली.
दरम्यान, अमरावती महापालिकेच्या बडनेरा झोन अंतर्गत ज्या गरजू व्यक्तींनी शौचायलय बांधले नाही, अशा व्यक्तींकडे कंत्राटदाराच्या माध्यमातून शौचालय बांधून देण्यात आले होते. दरम्यान, बडनेरा झोन अंतर्गत लाभार्थ्यांकडे शौचालयाचे बांधकाम पूर्ण झाल्यावर या कामाच्या देयकाची फाईल कंत्राटदारामार्फत महापालिका प्रशासनाकडे सादर करण्यात आली. या कामाचे देयक काढणाऱ्या कर्मचारी आणि अधिकाऱ्यांच्या स्वाक्षरीनंतर ही फाईल आयुक्त प्रशांत रोडे यांच्याकडे आली. आयुक्तांनी ही फाईल तपासली असता यावर असणाऱ्या अधिकारी आणि कर्मचाऱ्यांच्या स्वाक्षऱ्या बाबत त्यांना संशय आला.
कंत्राटदाराला 75 लाख रुपये देयक देण्यासाठीच्या फाईलवर बनावट स्वाक्षरी असल्याचे स्पष्ट होताच महापालिका आयुक्तांनी या प्रकरणाची चौकशी उपायुक्त विजय कोराटे यांच्याकडे दिली. उपायुक्तांनी या प्रकरणाचा चौकशी अहवाल बुधवारी (दि. 24 जून) सायंकाळी महापालिका आयुक्तांना सादर केला. या अहवालात कंत्राटदारास देयक देण्यासंदर्भातील सर्व कागदपत्रांवर अधिकारी आणि कर्मचाऱ्यांच्या स्वाक्षऱ्या बनावट असल्याचा निष्कर्ष नमूद करण्यात आला. या प्रकरणाचे गांभीर्य लक्षात घेत महापालिका आयुक्त प्रशांत रोडे यांनी या प्रकरणाची तक्रार शहर कोतवाली पोलिसांकडे देण्याचा निर्णय घेतला. गुरुवारी (दि. 25 जून) दुपारी या प्रकरणाची तक्रार शहर कोतवाली पोलीस ठाण्यात नोंदविण्यात आली असून पोलिसांनी नेमके प्रकरण समजून घेण्यासाठी संबंधित अधिकाऱ्यांना पोलीस ठाण्यात बोलावले होते. या प्रकरणात शहर कोतवाली पोलिसांकडून गुन्हे दाखल करण्याची प्रक्रिया सुरू होती.
हेही वाचा - शेतकऱ्यांना पीक कर्ज द्या, ताट-वाटी वाजवत भाजपचा जिल्हा बँकेवर मोर्चा
