अमरावती - कामगार मंत्री संजय कुटे यांनी आज गुरुकुंज मोझरी येथे राष्ट्रसंत तुकडोजी महाराजांच्या समाधीचे दर्शन घेतले. तुकडोजी महाराजांच्या विचाराने प्रेरित होऊन आपन समाजकार्याकडे वळलो असल्याचे त्यांनी यावेळी सांगितले.
मी माझे वैद्यकीय शिक्षण राष्ट्रसंत तुकडोजी महाराजांच्या कर्मभूमीत घेतले असून त्याचा मला अभिमान आहे. राष्ट्रसंत तुकडोजी महाराजांच्या विचारांची शिदोरी घेऊन मी पुढे गेलो आहे. त्यांच्या विचारांनी प्रेरित होऊन मी समाज कार्यात वळलो आणि आमदार ते थेट राज्यमंत्री झालो, अशी भावना राज्याचे कामगार मंत्री संजय कुटे यांनी 'ईटीव्ही भारत'शी बोलताना व्यक्त केली.
त्याचबरोबर राष्ट्रसंत तुकडोजी महाराज यांच्या विचारांचा जास्तीत जास्त प्रसार व्हावा. त्यांचे विचार महाराष्ट्राच्या कानाकोपऱ्यात पोहचावे. यासाठी मंत्रालय स्तरावर काम करणार असल्याचे त्यांनी सांगितले. ग्रामगीता ही सर्वच अर्थाने परिपूर्ण असून तिला पाठ्यपुस्तकात स्थान देण्यासाठी आपण प्रयत्न करणार असल्याचेही कुटे यांनी सांगितले.
