अमरावती - दर्यापूरकडून अमरावतीच्या दिशेने जाणाऱ्या भरधाव कारची व अमरावतीकडून दर्यापूरच्या दिशेने भरधाव जाणाऱ्या दुचाकीची समोरासमोर धडक होऊन अपघात झाला. ही घटना अमरावतीच्या दर्यापूर तालुक्यातील म्हैसपूर फाट्याजवळ आज दुपारी ४ वाजता घडली. यामध्ये दुचाकीने पेट घेतला असून दुचाकीस्वार गंभीर जखमी झाला आहे. मोहन आजनकर (रा. शिंगणापूर) असे जखमी झालेल्या शिक्षकाचे नाव असून सध्या त्याच्यावर अमरावती येथे उपचार सुरू आहे.
अकोला जिल्ह्यातील एक कुटुंब आपल्या परिवारसह अकोल्याहून दर्यापूरमार्गे अमरावतीकडे कारने जात असतात. अमरावतीकडून शिंगणापूरकडे दुचाकीने जाणाऱ्या मोहन आजनकर यांच्या दुचाकी व कारची समोरा-समोर भीषण धडक झाली. दुचाकीचालक आजनकर हे अमरावती येथे काही कामानिमित्त गेले होते. आपले काम आटोपून दुचाकीने शिंगणापूर गावाकडे परत जात असताना हा अपघात घडला. कार आणि दुचाकीची धडक एवढी भीषण होती की दुचाकीने जागेवर पेट घेतला. या धडकेत दुचाकीस्वार दुचाकीवरून बाजूला फेकला गेल्याने मोठी दुर्घटना टळली आहे. तर कारमधील एअर बॅग उघडल्याने कारमधील सर्वजण सुखरूप आहे.
हेही वाचा - थकबाकी न भरल्याने "शिवशाही" बस भररस्त्यात जप्त; फायनान्स कंपनीची कारवाई
