अमरावती - दर्यापूर तालुक्यातील भुईखेड या गावातील एका शेतकऱ्याने आत्महत्या करण्यापूर्वी एक व्हिडिओ तयार करून सोशल मीडियावर टाकला. त्यानंतर विष प्राशन करून आत्महत्या केल्याची धक्कादायक घटना घडली. शशिकांत गणेशराव मानकर (वय ४१) असे या शेतकऱ्याचे नाव असून २७ मे रोजी त्यांनी आत्महत्या केली.
मानकर यांनी अकोल्यातील दोन सावकारांकडून ९ लाख रुपये कर्ज काढले होते. त्याचे व्याज वाढत जाऊन एकूण कर्ज १५ लाख झाले होते. ही रक्कम परत करणे शक्य नसल्याने निराश होऊन मानकर यांनी आत्महत्या केली. अकोला येथील सावकार नरेंद्र देशमुख व किशोर देशमुख हे दोन्ही सावकार सावकारकीचा परवाना नसून सुद्धा शेतकऱ्यांना व्याजाने पैसे देतात. वेळेवर पैसे परत न दिल्यास प्रशासनाच्या अधिकाऱ्यांना हाताशी धरून शेकतकऱ्यांची जमीन हिसकावून घेतात ,असा आरोप केला जात आहे. मानकर यांनी देखील याच सावकारांकडून कर्ज घेतले होते.
या संदर्भात येवदा पोलीस ठाण्यात तक्रार दाखल करण्यात आली आहे. पोलिसांनी सदर घटनेची आत्मघाती मृत्यू म्हणून नोंद केली आहे. मात्र, आत्महत्या करण्यापूर्वी शेतकऱ्याने व्हिडिओ सोशल मीडियावर व्हायरल केला आहे. हा व्हिडिओ पुरावा म्हणून ग्राह्य धरून सावकारांवर गुन्हा दाखल करण्याची मागणी होत आहे.
मानकरांनी व्हिडिओत काय म्हटले आहे -
"हॅलो. हरीश हे शेवटचं बोलणं आहे गड्या आपलं.. मी चाललो गड्या जाण्याची इच्छा नाही, पण पर्याय नाही कृष्णाच्या आईकडे लक्ष देजो... खोटे नाटे आरोप नका करत जाऊ..मला डुबवलं... शेतीला वारस लावजा लवकर..फेरफार करून घ्या... कुटुंबाकडे लक्ष द्या... "
