अकोला - डिझेल आणि पेट्रोलने भरलेल्या टँकरमधून इंधन चोरी करणाऱ्या सहा जणांच्या टोळीला पोलिसांनी अटक केली. या आरोपींकडून तब्बल 21 लाख 91 हजारांचा मुद्देमाल जप्त केला आहे. या कारवाईने टँकरमधील डिझेल-पेट्रोल चोरणाऱ्या टोळीचा पर्दाफाश झाला आहे. ही कारवाई कोळबी येथील रॉयल धाब्यावर केली.
गायगाव येथून पेट्रोलियम कंपनीचे टँकर हे ग्राम कोळबी येथील रॉयल धाब्यावर येत असून धाबा मालक व टँकरचे चालक हे संगनमताने त्यामधून अवैधरित्या डिझेल, पेट्रोल काढून, साठवून, विक्री करतात, अशी माहिती मिळाली होती. त्यावरून रॉयल धाब्यावर जाऊन साडेचार वाजता पोलिसांनी छापा टाकला.
त्यावेळी धाब्याच्या मागे एक पेट्रोल-डिझेलचा टँकर (एम एच ३० एल ४२६८) उभा होता. त्यातून एका प्लास्टीकच्या पाईपने लोखंडी बॅरलमध्ये काही लोक पेट्रोल, डिझेल काढत होते. पेट्रोल-डिझेल चोरणाऱ्यांची नावे नदीम अहमद शेख, मोहम्मद आबीद शेख करीम, गजानन वाल्मीक चकनारायण, शेख मोहम्मद शेख इब्राहीम, सैयद आकीब सै. अलीम तसेच ट्रक चालक गुलाम फरीद गुलाम फारूख अशी आहेत.
या कारवाईत घटनास्थळावर व आरोपींकडून १५ लाख किमतीचा टँकर ताब्यात घेण्यात आला. ज्यामध्ये तीन कप्प्यात ९ केएल डिझेल, किंमत पाच लाख रूपये तसेच चौथ्या कप्प्यात ३ केएल पेट्रोल किंमत एक लाख 60 हजार रुपये असा एकूण 21 लाख 91 हजारांचा मुद्देमाल जप्त केला. ही कारवाई अधीक्षक एम. राकेश कलासागर यांच्या विशेष पथकाच्या पोलीस निरीक्षक मिलिंद भाकर यांनी केली.
