अकोला - शहरातील मुख्य रस्त्यावरील उड्डाणपुलाच्या बाजूला असलेल्या खड्ड्यात आज सकाळी एक दुचाकी पडली. यासोबतच दुचाकीवरील वडील आणि मुलगी दोघेही पडल्याने पालिका प्रशासनाचा भोंगळ कारभार समोर आला आहे. यानंतर स्थानिकांनी त्यांना सुखरूप बाहेर काढले. हा खड्डयाचा आकार एवढा मोठा आहे, की संपूर्ण दुचाकी यामध्ये अडकली.
ज्या खड्ड्यात ही दुचाकी पडली त्या खड्ड्यातून मात्र पाण्याचा विसर्ग मोठ्या प्रमाणात होत होता. जेल चौक ते अग्रेसन चौकापर्यंत उड्डाणपुलाचे काम सुरू आहे. यामुळे उड्डाणपुलाच्या दोन्ही बाजूंचा रस्ता कच्चा झाल्याने सर्वत्र खड्डे पडले आहेत. या खड्ड्यांमधून वाहन चालवताना वाहनचालकांना कसरत करावी लागते.
टॉवर चौकातील पाडिया कॉम्प्लेक्सजवळ अशाच प्रकारचा खड्डा आहे. संबंधित खड्ड्यातून मोठ्या प्रमाणात पाण्याचा विसर्ग होत आहे. या डबक्यामुळे वाहनचालकांना अंदाज येत नसल्याने काही अपघात घडले आहेत.
आज सकाळी मुलीला शाळेत सोडण्यासाठी जात असताना गाडी खड्ड्यात गेल्याने नियंत्रण सुटले आणि दोघेही पडले. यानंतर परिसरातील नागरिकांनी त्यांना वाचवण्यासाठी धाव घेतली. ज्या खड्ड्यात त्यांची दुचाकी पडली त्यामधून पाण्याचा मोठ्या प्रमाणात विसर्ग होत आहे. उड्डाणपूल कंत्राटदार आणि महापालिका प्रशासनाचे मात्र या रस्त्यांकडे दुर्लक्ष होत आहे.
