अकोला- एसटी महामंडळाचे पंधराशे कोटी शासनाने द्यावे, जेणेकरून एसटीचे भले होईल, अशी मागणी एका विद्यार्थिनीने आदित्य ठाकरे यांच्याकडे केली आहे. दीपाली गीते असं या विद्यार्थीनीचे नाव आहे. मात्र, आदित्य ठाकरे यांनी याबाबत परिवहन मंत्र्यांशी चर्चा करून निर्णय घेतो, असे म्हणून तिच्या प्रश्नाला बगल दिली. त्यामुळे या विद्यार्थिनीचा पुरता हिरमोड झाला आहे. हे राजकीय उत्तर असून त्याने माझे समाधान झाले नसल्याचे यावेळी या विद्यार्थिनीने म्हटले.
युवा सेना पक्ष प्रमुख आदित्य ठाकरे यांची जिल्ह्यात जनसंवाद यात्रा होती. त्यानिमित्ताने ते डॉ.पंजाबराव देशमुख कृषी विद्यापीठाच्या दीक्षांत समारंभ सभागृहात विद्यार्थ्यांशी सवांद साधत होते. त्यादरम्यान दीपली गीते या विद्यार्थिनीने त्यांना हा उपरोक्त प्रश्न केला होता. कार्यक्रमात मुलींच्या सुरक्षेचा प्रश्न आणि खासगी शिकवणी वर्गातील वाढते शुल्क याबाबत चर्चा झाली. त्याचबरोबर, शाळा, महाविद्यालयातील व्यवस्थापन कोट्यामधून गरीब विद्यार्थ्यांना प्रवेश का मिळत नाही ? वन मेरीट वन नेशन, याबाबत विद्यार्थ्यांनी आदित्य यांना प्रश्न विचारले.
