अहमदनगर - लोकसभेच्या नगर दक्षिणच्या जागेसाठी आजपासून अर्ज भरण्यास सुरूवात झाली आहे. आज (गुरुवार) पहिल्या दिवशी २१ उमेदवारांनी अर्ज नेले आहेत. ४ एप्रिल ही अर्ज दाखल करण्याची शेवटची तारीख आहे. या मतदारसंघात भाजपच्या सुजय विखे पाटील आणि राष्ट्रवादीचे संग्राम जगताप यांच्यात अत्यंत चुरशीची लढत होणार असल्याची चिन्ह दिसत आहेत.
अर्ज दाखल करण्यासाठी जिल्हाधिकारी कार्यालयात स्वतंत्र कक्ष स्थापन करण्यात आले असून, उमेदवारांना याठिकाणी आवश्यक ती माहिती दिली जात आहे. जिल्हाधिकरी राहुल द्विवेदी यांनी या परिसरात प्रतिबंधात्मक आदेश जारी केले असून, तीनपेक्षा अधिक वाहने आणि चारपेक्षा जास्त व्यक्तींना एकत्र येण्यास मज्जाव असणार आहे. आज वंचित बहुजन विकास आघाडीचे उमेदवार सुधाकर आव्हाड, मराठा क्रांती मोर्चाचे समनव्यक संजीव भोर, संभाजी गायकवाड यांनीही अर्ज नेले आहेत.
जिल्हाधिकारी कार्यालयाकडे येणारे रस्ते आजपासून बंद करण्यात आले आहेत. आदर्श आचारसंहितेचे तंतोतंत पालन व्हावे यासाठी निवडणूक विभाग पोलिसांच्या मदतीने सतर्क असल्याचे चित्र दिसत आहे. ४ एप्रिलपर्यंत सुट्या सोडून सकाळी ११ ते दुपारी ३ वाजेपर्यंत उमेदवारांना अर्ज दाखल करता येतील. ५ एप्रिलला अर्जाची छाननी होणार असून, ८ एप्रिलपर्यंत अर्ज माघारीची मुदत असणार आहे. नगर दक्षिण लोकसभा मतदारसंघासाठी २३ एप्रिल रोजी मतदान होईल.
अहमदनगर दक्षिण लोकसभा मतदारसंघातील एकूण ६ विधानसभा मतदारसंघात मिळून एकूण 18 लाख 46 हजार 314 मतदार आहेत. यात 9 लाख 66 हजार 797 पुरुष तर, 8 लाख 89 हजार 431 स्त्री मतदार तर इतर 86 मतदार आहेत. दिव्यांग मतदारांची संख्या 6 हजार 790 इतकी आहे.
आज अर्ज नेलेले उमेदवार
रेनाविकर चंद्रकांत दामोदर, दरेकर श्रीधर जाखूजी पोपळघट, कलीराम बहिरू, पादळे ज्ञानदेव कारभारी, वाळके नामदेव अर्जुन, आव्हाड सुधाकर लक्ष्मणराव, घोरपडे साईनाथ भाऊसाहेब, रासकर सुरेश मार्तंड, वाघमोडे दत्तात्रय अप्पाव, लाकूडझोडे विलास सावजी, देठे सुनिल एकनाथ, पाटोळे भास्कर फकिरा, गायकवाड भागवत धोंडीबा, संसारे संदीप तुकाराम (संजीव भोर यांच्यासाठी), गाडेकर नीलेश दत्तात्रय, गायकवाड संभाजीराव महादू, शेख रियाजोद्दीन फजलोद्दीन, पवार विजय सोपान, बनसोडे शांताराम अंतावन, ठवाळ अनिल भगवान, राऊत सुनील गंगाधर, लोंढे प्रकाश अण्णासाहेब या उमेदवारांनी अर्ज नेले आहेत.
