अहमदनगर - पुणे-नाशिक महामार्गावर संगमनेर शहराजवळील मालपाणी गोडाऊनजीक ट्रक आणि दुचाकीचा अपघात होऊन दोन जण जागीच ठार झाल्याची दुर्दैवी घटना घडली. या अपघातात अकोले तालुक्यातील कळस येथील अशोक सोमनाथ वाघ आणि त्यांची तीन वर्षांची चिमुरडी शकुंतला अशोक वाघ या बापलेकीचा जागीच मृत्यू झाला, तर पत्नी आशाबाई अशोक वाघ आणि त्यांचा एक नातेवाईक दिलीप भाऊसाहेब मेंगाळ या दोघांची प्रकृती चिंताजनक आहे.
संगमनेर शहरालगत असणाऱ्या कासारवाडी येथील नातेवाईकांकडे यात्रेनिमित्त ते आले होते, यात्रेवरून दुचाकीवर स्वगावी परतत असताना काळाने त्यांच्यावर घाला घातला. मोटारसायकल (क्र. MH -१५ AR ६०६६) आणि ट्रक (क्र. - MH ४३ U ७४९१) यांच्यात हा अपघात झाला. नाशिकहून सिमेंटचे ठोकळे घेऊन हा ट्रक पुण्याच्या दिशेने चालला होता, चालक विशाल संतोष वाघ याला याप्रकरणी पोलिसांनी अटक केली आहे. याच ठिकाणी तीन महिन्यांपूर्वी नाशिकमधील एका कुटुंबाला आपला जीव गमवावा लागला होता.
