अहमदनगर - अकोले तालुक्यातील देवठाण येथे विहिरीचे खोदकाम सुरू असताना क्रेन तुटून अंगावर कोसळल्याने तीन मजुरांचा मृत्यू झाल्याची धक्कादायक घटना घडली आहे. एकाच वेळी तीन मजुरांचा मृत्यू झाल्याने संपूर्ण गावावर शोककळा पसरली आहे. बाळासाहेब शेळके (रा. देवठाण), गणेश कदम (रा.हिवरगाव आंबरे) आणि नवनाथ शिंदे (रा.वडगाव लांडगा) असे मृत्यू झालेल्या कामगारांची नावे आहेत. रामहरी दगडू जोर्वेकर यांच्या मालकीच्या विहिरीचे खोदकाम सुरू होते.
दुपारचे जेवण आटोपल्यानंतर बाळासाहेब शेळके, गणेश कदम आणि नवनाथ शिंदे हे तिघे क्रेनच्या साहाय्याने खाली विहिरीत उतरत होते. यावेळी वायर तुटुन हे तिघेही विहिरीत जोरात कोसळले. विहिरीतील खडकावर आपटून बाळासाहेब शेळके व गणेश कदम यांचा जागीच मृत्यू झाला तर नवनाथ शिंदे यांचा रुग्णालयात नेत असताना मृत्यू झाला.
या घटनेतील दोन्ही मृत व्यक्तींना शवविच्छेदनासाठी अकोले ग्रामीण रुग्णालयात हलविण्यात आले, तर नवनाथ शिंदे याचा रस्त्यात असतानाच मृत्यू झाल्याने त्यांचा मृतदेहही ग्रामीण रुग्णालयात आणण्यात आला. या घटनेची माहिती मिळताच अकोले ग्रामीण रुग्णालयाबाहेर नातेवाईकांनी मोठी गर्दी केली होती. या घटनेने संगमनेर व अकोले तालुक्यावर मोठी शोककळा पसरली आहे. विहीर मालक आणि मृत्युमुखी पडलेले तिघेही एकमेकांचे नातेवाईक आहेत. मृत बाळासाहेब शेळके हा पंचायत समितीचे माजी सदस्य अरुण शेळके यांचे चुलत बंधू होते. या घटनेची पोलिसांनी चौकशी सुरू केली आहे.