अहमदनगर - गेल्या वर्षी आलेल्या निसर्ग चक्रीवादळात राज्य सरकरने मदतीची घोषण केली होती. मात्र अद्यापही ती मदत नागरिकांना मिळाली नाही. आता आलेल्या या चक्रीवादळात अनेकांचे मोठ्या प्रमाणात नुकसान झाले असून, राज्य सरकारने आता तरी नुकसानग्रस्तांना मदत करावी अशी मागणी विरोधपक्ष नेते देवेंद्र फडणवीस यांनी केली आहे. ते आज कोपरगावमध्ये बोलत होते.
पुढे बोलताना ते म्हणाले की, स्वतः चे अपयश झाकण्यासाठी प्रत्येक गोष्टीत केंद्र सरकारकड़े बोट दाखवण्याची सवय राज्य सरकारला लागली आहे. कधी तरी आत्मचिंतन करून आपण काय केले पाहिजे, याचा विचार राज्य सरकारने करावा, अशी टीका फडणवीस यांनी केली आहे. कोरोना काळात सर्वांना मिळून काम करायचे आहे. मात्र चांगले झाले तर आम्ही आमची पाठ थोपटून घेतो, आणि अडचणी आल्या तर केंद्राकडे बोट दाखवतो. ही राज्य सरकारची भूमिका योग्य नसल्याचेही त्यांनी म्हटले आहे.
'शेतकरी विम्यापासून वंचित'
कोपरगाव विधानसभा मतदारसंघाच्या माजी आमदार स्नेहलता कोल्हे यांनी उभरलेल्या कोविड केअर सेंटरचे उद्घाटन आज देवेंद्र फडणवीस यांच्या हस्ते करण्यात आले. यावेळी बोलताना त्यांनी विविध विषयांवरून राज्य सरकारवर जोरदार टीका केली. ते म्हणाले की, पंतप्रधान पीक विमा योजनेचे टेंडर राज्य सरकारने उशिरा काढले, त्यात काही जिल्ह्यांचे टेंडर झालेच नाही. राज्य सरकारने फळपिकांचे निकष बदलल्याने ज्या ठिकाणचे टेंडर निघाले आहे, त्या लोकांना देखील विमा मिळाला नाही, अशी टीका यावेळी फडणवीस यांनी केली आहे.
