अहमदनगर - नशिबाने आपल्याला मुबलक दिले आहे. मात्र, त्याच्यावर फक्त माझाच अधिकार आहे का? असा प्रश्न एका शिक्षक दाम्पत्याला पडला. यानंतर त्यांनी 'जे का रंजले गांजले त्यासी म्हणे जो आपुले, तोचि साधू ओळखावा, देव तिथेची जाणावा' या संत तुकाराम महाराजांच्या अंभगाला अंगिकारत समाजातील शक्य तेवढ्या वंचित घटकाला मदत करायचे व्रत हाती घेतले. त्यांच्या या उपक्रमातून अनेक निराधार, वंचित आणि होतकरू सामाजिक घटक आता पुन्हा जीवनातील नवी उमेद घेत आहेत. नगर जिल्ह्यातील पाथर्डी तालुक्यातील या शिक्षक दाम्पत्याचे काम अनेकांसाठी दिपस्तंभासारखे आदर्शवत असेच म्हणावे लागेल.
जीवनातला खरा आनंद दुसऱ्याला मदत करण्यात -
नगर जिल्ह्यातील पाथर्डी तालुक्यातील हे शिक्षक दाम्पत्य आहे. पोपटराव फुंदे आणि अनुराधा फुंदे असे या दाम्पत्याचे नाव आहे. आपल्या दुचाकीवर ते घराबाहेर पडतात आणि परिसरातील माहिती मिळालेल्या दुःखी-पीडित कुटुंबाच्या घरी जात मदतीचा हात पुढे करतात, हा त्यांचा नित्यक्रम आहे. फुंदे शिक्षक दाम्पत्य करंजी परिसरातील जिल्हा परिषद शाळेत शिक्षक म्हणून कार्यरत आहेत. मात्र, कुठेतरी आपल्याला जे काही मिळते आहे यावर फक्त आपलाच अधिकार नाही. तर दुसऱ्याला अपेक्षित मदत करण्यात आनंद आहे, हा मूलमंत्र त्यांना उमगला. यानंतर आपल्या घासातला घास वंचितांसाठी राखीव ठेवत ते अनेकांना मदतीचा हात देत आहे.
दाम्पत्याची अपेक्षा -
समाजातील वंचितांना आधार देण्यासाठी, गरिबी दूर करण्यासाठी एकटे फुंदे दाम्पत्य अपूर्ण आहे. म्हणून यासाठी अनेकांनी पुढे येण्याची गरज आहे, असे मत या दाम्पत्याने व्यक्त केले आहे.
हेही वाचा - राज्यात शिवशाही नाही, ही तर मोगलाई; चित्रा वाघांचा महाविकास आघाडीवर घणाघात
निराधार मुलांचे स्वीकारले पालकत्व -
करंजी परिसरातील एका वस्तीवर राहणाऱ्या शिंदे कुटुंबातील आई आणि वडिलांचा वर्षभराच्या अंतराने मृत्यू झाला. त्यांची पाच लहान लेकरे उघड्यावर आली. घरात फक्त वृद्ध आजी-आजोबा आहेत. घटनेनंतर ते हतबल झाले होते. ही गोष्ट या शिक्षक दाम्पत्याला समजल्यावर त्यांनी या सर्व कुटुंबाचा आधार बनण्याचा निर्णय घेतला. या मुलांच्या केवळ शिक्षण-कपडेच नव्हे तर मोठी मुलगी पायावर उभी राहावी, म्हणून शिलाई मशीन त्यांनी घेऊन देत तिला स्वयंरोजगाराचा मार्ग दिला.
समाजातील दरी मिटवण्याचा प्रयत्न -
लॉकडाऊनच्या काळात अनेक कुटुंबांना विविध समस्यांनी ग्रासले. अशात शिक्षकांना मात्र नियमित पगार सुरू होता. त्यात त्यांना सातवा वेतन आयोग लागू झाला. समाजातील एका घटकाला अनंत अडचणींना सामोरे जावे लागत असताना एक दुसरा घटक सुख-समृद्धीचे जीवन जगतो आहे. मात्र, हाच विरोधाभास आता फुंदे दांपत्याच्या समाजसेवेचा पुढील जीवनाचा मार्ग बनला आहे. आपल्या कुटुंबासोबत इतर वंचित घटकाला सोबत जोडून जमेल तेवढ्या गरजू कुटुंबांना मदतीचा हात देण्याचा संकल्प फुंदे शिक्षक दाम्पत्याने घेतला आहे.
