अहमदनगर - मधुकर पिचड हे राष्ट्रवादीच्या स्थापनेपासून शरद पवारांबरोबर होते. मात्र पिचड यांनी आता पवारांची साथ सोडत भाजपचा झेंडा हाती धरला आहे. त्यामुळे अकोले तालुक्यात राष्ट्रवादी काँग्रेसची ताकद कमी झाल्याचे वाटत होते. मात्र, राष्ट्रवादी काँग्रेसनेही आता निवडणुकांच्या पार्श्वभूमिवर पिचड विरोधकांची एकत्र मुठ बांधली आहे. त्यामुळे राष्ट्रवादीने पिचड यांच्या विरोधकांच्या माध्यमातूनच त्यांना शह देण्याची तयारी सुरु केली आहे.
अकोले तालुका हा आदिवासी बहूल तालुका आहे. गेल्या काही वर्षांपासून पिचड यांनी काँग्रेस आणि राष्ट्रवादी काँग्रेसच्या माध्यमातून राजकारण करत येथील आमदारकी भूषविले. मात्र ऐन विधानसभा निवडणुकीच्या आधी पिचड पिता-पुत्रांनी भाजपत प्रवेश केला. त्यामुळे, पिचड यांच्या विरोधात नेहमी संघर्ष करणारे अशोक भांगरे आणि किरण लहमटेसह अनेक कार्यकर्त्यांमध्ये नाराजी पसरली होती. मात्र, आता पिचड यांना लढा देण्यासाठी सर्व पिचड विरोधकांनी एकत्र येत राष्ट्रवादी काँग्रेसमध्ये प्रवेश केला आहे.
हेही वाचा- राष्ट्रवादीतील 'त्या' नेत्याची दादागिरी भविष्यात खपवून घेणार नाही - माजी महापौर कळमकर
प्रवेश करणाऱ्यांमध्ये प्रामुख्याने भाजपचे जिल्हा परिषद सदस्य किरण लहामटे आणि सदस्या सुनिता भांगरे यांचा समावेश आहे. या दोघांनी अजित पवारांच्या उपस्थितीत राष्ट्रवादी काँग्रेसमध्ये प्रवेश केला आहे. दरम्यान, अकोले तालुक्यात आज राष्ट्रवादी काँग्रेसने जोरदार शक्ती प्रदर्शन केले. त्याचबरोबर, राष्ट्रवादीकडून एक मेळावा देखील घेण्यात आला आहे. या मेळाव्यात मोठ्या प्रमाणात गर्दी झाली होती. यावेळी पिचड पिता पुत्रांवर अनेकांनी जोरदार टिकेची झोड उठवली.
