अहमदनगर - शिर्डी साईबाबांच्या जन्‍मस्‍थळाबाबत मुख्यमंत्र्यांनी केलेले विधान तातडीने मागे घ्‍यावे, अशी मागणी आमदार राधाकृष्ण विखे पाटील यांनी केली. साईबाबांच्या जन्‍मस्‍थळावरून पाथरीच्‍या विकास निधी देण्‍यास आमचा विरोध नाही, पण पाथरीकरांकडून केल्‍या जाणाऱ्या दाव्‍याला सरकारने भावनिकतेतून पाठबळ देवू नये, असे सुचित करताना या वादामागील प्रवृत्‍तीही आता शोधण्‍याची वेळ आली आहे. उद्यापासून (दि. 19 जाने.) शिर्डीसह 25 गावे बंद राहणार असून जर मुख्यमंत्र्यांनी उद्यापर्यंत आपली भूमिका स्पष्ट नाही केली तर हा बंद बेमुदत करण्यात येईल. बंदला माझाही पाठिंबा असल्याचे विखे पाटलांनी पत्रकारांशी बोलताना सांगितले.
साईबाबांच्या जन्‍मस्‍थळावरुन निर्माण झालेल्‍या वादाच्‍या पार्श्‍वभूमीवर आमदार विखे पाटील यांनी शिर्डी विश्रामगृहात गावातील प्रमुख पदाधिकाऱ्यांची बैठक घेतली. त्यानंतर माध्‍यमांशी संवाद साधताना आमदार विखे पाटील यांनी उद्याच्‍या बंदला माझा पाठींबा असून, शिर्डीकर ग्रामस्थ जो निर्णय घेतील त्‍यांच्‍या भु‍मिकेबरोबर मी आहे असे स्पष्ट करत त्‍यांनी सांगितले की, साईबाबांच्या जन्‍मस्‍थळाचे दावे यापूर्वीही 8 ते 10 वेळा केले गेले. असे वाद जाणीवपूर्वक उपस्थित करुन लाखो साईभक्‍तांच्‍या भावनेशी खेळण्‍याचा प्रयत्‍न होत आहे का? शिर्डीची सामाजिक, अध्‍यात्‍मीक घडी मोडण्‍याचा प्रयत्‍न केला जातोय का? या मागे नेमक्‍या कोणत्‍या प्रवृत्‍ती आहेत हे शोधण्‍याची आता खरी गरज निर्माण झाली असल्याचे त्‍यांनी स्पष्ट केले.
हेही वाचा - शिर्डीकरांनी बंद मागे घेण्याचे मुख्यमंत्र्यांचे आवाहन; नीलम गोऱ्हेंनी घेतली मुख्यमंत्र्यांची भेट
आपल्‍याकडे ऋषीचे कुळ आणि नदीच मूळ कधीच शोधु नये, असे म्‍हटले जाते. त्‍याच प्रमाणे साईबाबांनी आपल्‍या हयातीत जात, धर्म, पंथ कधी उघड केले नाहीत. जातीचा आणि धर्माचा अडसर माणुसकीत येवू नये हाच विचार साईबाबांनी मांडला. त्‍यामुळेच जगभरातील भाविकांसाठी शिर्डी हे श्रध्‍दास्‍थान सर्वधर्म समभावाचे प्रतिक ठरले आहे. याकडे लक्ष वेधुन विखे पाटील म्हणाले की, सबका मालिक एक हा संदेश घेवून देशात आणि देशाबाहेर साईबाबांची असंख्‍य मंदिरे उभी राहिली. ती त्या त्या भागाच्‍या सामाजिक उत्‍कर्षासाठी कारणीभूत ठरली. पाथरीचे साईमंदिर हे त्‍यापैकीच आम्‍ही एक मानतो. या परिसराचा विकास करण्‍यास आमचा विरोध नाही. पण, साईबाबांच्या जन्‍मस्‍थळाचा भावनिक मुद्दा उपस्थित करुन तो विकास नको ही आमची भूमिका आहे, असे त्‍यांनी ठामपणे सांगितले.
हेही वाचा - शिर्डी बंद; साई-मंदिरातील दैनंदीन कार्यक्रमात कोणताही बदल नाही
साईबाबांच्या जन्‍मस्‍थळाचा वारंवार मुद्दा उपस्थित करुन केवळ शिर्डीतील नागरिकांच्‍याच नाही तर लाखो साईभक्‍तांच्‍या भावनेला हात का घातला जातो असा प्रश्‍न उपस्थित करुन ते म्हणाले की, यापूर्वी राष्‍ट्रपतींनीही असेच भाष्‍य केल्‍यानंतर शिर्डीतील ग्रामस्‍थांनी त्‍यांची भेट घेवून याबाबतीतला समज दुर केला होता. त्‍यानंतरच राष्‍ट्रपतींनी पाथरीला जाण्‍याचे टाळले होते. राष्‍ट्रपती असतील किंवा सध्‍याचे मुख्‍यमंत्री असतील यांना दिशाभूल करणारी माहीती देवून सातत्‍याने या वादाला खतपाणी कोण घालत आहे, याचा शोध सरकारने घेण्‍याची मागणी त्‍यांनी केली.
पाथरीकरांकडे साईबाबांच्या जन्‍माचे 29 पुरावे आहेत. तर साईबाबांचे जन्‍मशताब्‍दी वर्ष संपल्‍यानंतरही हे पुरावे घेवून पुढे कोणीच आले नाही. दाभोळकरांनी जे मूळ साईचरित्र लिहीले आहे. त्‍यामध्‍येही साईबाबांच्या जन्‍मस्‍थळाचा कुठेही उल्‍लेख नाही. त्‍यामुळेच दाभोळकरांच्‍या साईचरित्राची मूळ प्रत संस्‍थानच्‍या ताब्‍यात आता आली आहे. त्‍याचे पुनर्प्रकाशन संस्‍थानने करावे. इतर भाषांमधील साईचरित्रासाठीही दाभोळकरांचेच साईचरित्र आधारभूत मानावे जेणेकरुन सातत्‍याने निर्माण होणारे वाद थांबले जातील, असे विखे पाटील यांनी सूचित केले.
दरम्‍यान, शिर्डी बंदला माझा पूर्णपणे पाठिंबा असून, याबाबत मुख्यमंत्र्यांनी तातडीने आपले विधान मागे घेवून भूमिका स्पष्ट करावी. या वादा संदर्भात शासन कोणतीतरी समिती नेमण्‍याच्‍या विचारात आहे. त्‍याला आपला पूर्ण विरोध असून अशा प्रकारची समिती नेमण्‍याची आवश्‍यकताच नसल्‍याचे त्‍यांनी एका प्रश्‍नाला उत्‍तर देताना सांगितले.
हेही वाचा - साई जन्मस्थळाच्या वादातून शिर्डीसह 25 गावांत रविवारपासून बेमूदत बंद!
