पाणीपुरी खाताय..? सावधान; नगरमध्ये आढळल्या पाणीपुरीत अळ्या

अहमदनगर शहरात एका पाणीपुरी विक्रेत्याच्या पाणीपुरीमधे अळ्या आढळल्याने संताप व्यक्त होत आहे. अनेक पाणीपुरी विक्रेते नागरिकांच्या जीवाशी खेळ करत असल्याची बाब या निमित्ताने समोर आली.

अहमदनगर - शहरात एका परप्रांतीयाच्या पाणीपुरीमधे अळ्या आढळल्याने संताप व्यक्त होत आहे. नेप्ती चौकातील एका हातगाडीवर पाणीपुरी विकली जात होती.

आज (शनिवार) दुपारी काही तरुण पाणीपुरी खात असताना त्यांना पाणीपुरीतील पाण्यात जिवंत अळ्या आढळून आल्या. तरुणांनी ही बाब पाणीपुरीवाल्याच्या लक्षात आणून दिल्यावर त्याने माफी मागत, हे पाणी तीन दिवसांपूर्वीचे असल्याचे कबूल केले. चूक मान्य करत त्याने रस्त्यावरच गाडी सोडून पळ काढला. अनेक पाणीपुरी विक्रेते नागरिकांच्या जीवाशी खेळ करत असल्याची बाब या निमित्ताने समोर आली. पाणीपुरी विक्रेते अशुद्ध पाण्यात पाणीपुरीचे साहित्य तयार करत असल्याचे बोलले जात आहे. महानगरपालिका आणि अन्न-औषध प्रशासन विभागाने शहरातील पाणीपुरीसह विविध खाद्य पदार्थांच्या गाड्यांवरील खाद्यपदार्थ तपासून कारवाई करावी, अशी मागणी नागरिक करत आहेत.