अहमदनगर - देशात, राज्यात आणि नगर जिल्ह्यात रेमडेसिवीर इंजेक्शनसाठी रांगा लागत आहेत. राज्य सरकारला त्याचा पुरेसा पुरवठा होत नाही. भाजपच्या लोकांना मात्र, रेमडेसिवीर इंजेक्शनचा साठा कसा मिळतो हा प्रश्न मला पडला आहे, असे वक्तव्य राज्याचे ग्रामविकास मंत्री आणि नगर जिल्ह्याचे पालकमंत्री हसन मुश्रीफ यांनी केले. नगरमध्ये कोरोना विषयक आढावा बैठकीनंतर घेतलेल्या पत्रकार परिषदेत ते बोलत होते. यावेळी त्यांनी खासदार सुजय विखेंवर निशाणा साधला.
फडणवीस आरोपीसाठी पोलीस ठाण्यात गेले -
आपल्याला न्यायालयाच्या निर्णयाबद्दल कसलीही टिप्पणी करायची नाही. मात्र, विधानपरिषदेचे विरोधीपक्ष नेते प्रवीण दरेकर, आमदार प्रसाद लाड यांना दीव-दमनमधून पन्नास हजार इंजेक्शनचा साठा मिळतो. त्याविषयी साधी चौकशी केली करण्याचा प्रयत्न झाला तर आरोपीसाठी विरोधीपक्ष नेते थेट पोलीस ठाण्यात येतात. आता नगरमध्येही भाजपच्याच खासदाराला इंजेक्शन उपलब्ध झाले. त्यामुळे मला प्रश्न पडला की, फक्त भाजपच्याच लोकांना रेमडेसिवीर इंजेक्शन कसे काय उपलब्ध होते, अशा शब्दांत मुश्रीफांनी भाजपवर टीका केली.
परमबीर सिंहची चौकशी करा -
ठाणे पोलीस आयुक्तपदी असताना परमबीर सिंग यांनी हजारो कोटींचा भ्रष्टाचार केल्याची तक्रार अकोल्यातील वरिष्ठ पोलीस निरीक्षक भीमराज घाडगे यांनी पोलीस महासंचालक तसेच लाचलुचपत प्रतिबंधक विभागाकडे केली आहे. जर, न्यायालय शंभर कोटीच्या तक्रारीची दखल घेत असेल तर हजार कोटीच्या तक्रारीची दखल निश्चित घेईल, असा विश्वास असल्याचे मुश्रीफ म्हणाले. सिंग यांचे अंडरवर्ल्डशी संबंध असल्याची तक्रार गंभीर आहे. शासनाने याची चौकशी केली पाहिजे, असेही मुश्रीफ म्हणाले. सचिन वाझेला अटक करू आता न्यायालयीन कोठडी मिळाली असली तरी एएनआयने अजून काहीच खुलासा केलेला नाही याकडेही त्यांनी लक्ष वेधले.
हेही वाचा - कॅन्सरग्रस्त चार वर्षीय 'परी'ने जिंकली कोरोना विरुद्धची लढाई
