शिर्डी (अहमदनगर) - साईबाबा संस्थानने भाविकांच्या पोषाखाबाबत घेतलेल्या निर्णयाला आज शिर्डी ब्राह्मण महासंघाने पाठिंबा दर्शवला आहे. भारतीय पेहरावात भाविकांनी मंदिरात येण्याच्या निर्णय योग्य असल्याचे महासंघाचे म्हणने आहे. साई संस्थानच्या वतीने मंदिर परिसरात लावण्यात आलेल्या आवाहन फलकाची आज पुणे ब्राह्मण संघाचे अध्यक्ष आनंद दवे आणि शिर्डीतील ब्राह्मण संघाच्या वतीने पुष्पहार घालत श्रीफळ फोडून पूजा केली. तृप्ती देसाईंनी शिर्डी मंदिरात लावण्यात आलेले फलक हटवण्याचा प्रयत्न केल्यास ब्राह्मण महासंघ त्याला तोडीस-तोड उत्तर देईल, असा इशाराही महासंघाचे अध्यक्ष आनंद दवे यांनी दिला.
भूमाता ब्रिगेडच्या तृप्ती देसाईंचा संस्थानला इशारा
शिर्डीतील साईबाबा मंदिरात दर्शनासाठी येणाऱ्या भाविकांनी भारतीय पोशाखात यावे, अशी विनंतीवजा सूचना साईबाबा संस्थानने केली आहे. यावरून आता वाद निर्माण झाला आहे. भूमाता ब्रिगेडच्या तृप्ती देसाई यांनी संस्थानला इशारा दिला आहे. साई संस्थानने असे फलक न हटवल्यास आम्ही स्वतः 10 डिसेंबरला शिर्डीत येऊन हे फलक काढू, असा इशारा त्यांनी दिला आहे. मंदिरातील पुजारी हे अर्धनग्न अवस्थेत असतात, ते फक्त सोवळे नेसतात. यावर कधी कोणत्या भक्ताने आक्षेप घेतलेला नाही, असे नमूद करत तृप्ती देसाई यांनी संस्थानच्या निर्णयावर आक्षेप नोंदवला आहे.
