अहमदनगर - छत्रपती उदयनराजे भोसलेंना शिवाजी महाराजांचे वंशज असल्याचे पुरावे मागितल्यावरून शिवसेना खासदार संजय राऊत यांच्या विरोधात राज्यात ठिकठिकाणी वातावरण तापले आहे. याचे पडसाद अहमदनगर येथेही पहायला मिळाले. गुरुवारी शहर भाजपच्या वतीने राऊत यांच्या फोटोला 'जोडे मारो' आंदोलन करून निषेध व्यक्त करण्यात आला. संजय राऊतांना मुख्यमंत्री ठाकरे यांनी समज देऊन कारवाई करावी, अशी मागणीही करण्यात आली.
राऊत यांनी बुधवारी पुण्यातील एका कार्यक्रमामध्ये 'माजी खासदार उदयनराजे भोसले यांनी छत्रपती शिवाजी महाराजांचे वंशज असल्याचा पुरावा द्यावा,' असे वक्तव्य केले होते. तसेच माजी पंतप्रधान इंदिरा गांधी या गँगस्टर करीम लाला याला भेटत असत, असेही त्यांनी वक्तव्य केले होते.
हेही वाचा - राऊतांच्या 'त्या' वक्तव्याचे राज्यभरात पडसाद; उदयनराजे समर्थक रस्त्यावर
इंदिरा गांधींबद्दलच्या वक्तव्यावर काँग्रेसने नाराजी व्यक्त केल्यानंतर राऊतांनी ते वक्तव्य मागे घेत असल्याचे जाहीर केले. मात्र, उदयनराजेंच्या वक्तव्यावर ते अजूनही ठाम असल्याने भाजपने राज्यभर जोरदार आंदोलने सुरू केली आहेत. 'आज के शिवाजी नरेंद्र मोदी' या वादग्रस्त पुस्तकाच्या निमित्ताने सुरू झालेला वाद संजय राऊतांच्या वक्तव्यानंतर अजून पेटला आहे.
