अहमदनगर - कृषी उत्पन्न बाजार समितीने शासन निर्देशाप्रमाणे आपल्‍या उत्‍पन्‍नातून १० लाख रुपयांची मदत प्रवरा कोविड सेंटरला केली आहे. या रक्‍कमेचा धनादेश बाजार समितीच्‍या पदाधिकाऱ्यांनी आमदार राधाकृष्‍ण विखे पाटील यांच्‍याकडे सुपूर्त केला. विविध दानशुर व्‍यक्‍ती आणि संस्‍थांनी एकूण १४ लाख रुपयांची मदत या कोविड सेंटरसाठी उपलब्‍ध करून दिली आहे.
कृषी उत्पन्न बाजार समितीची कोविड सेंटरला मदत -
कृषी उत्पन्न बाजार समित्‍यांना कोविड संकटाच्‍या उपाययोजनांसाठी आपल्‍या वाढीव उत्‍पन्‍नाच्‍या प्रमाणात रक्‍कम खर्च करण्‍याचे आदेश देण्‍यात आले होते. त्‍यानुसार राहाता कृषी उत्पन्न बाजार समितीने आपल्‍या उत्‍पन्‍नातून १० लाख रुपयांची मदत कोविड संकटात रुग्‍णांच्‍या उपचारासाठी प्रवरा कोविड सेंटरसाठी उपलब्‍ध करून दिली आहे. बाजार समितीचे सभापती भाऊसाहेब जेजूरकर, उपसभापती बाळासाहेब जपे, संचालक बापूसाहेब आहेर, वाल्‍मीकराव गोर्डे, शरद मते, गोरक्ष गोरे, चंद्रभान बावके, यशवंत चौधरी, सचिव उद्धव देवकर आदींनी हा धनादेश आमदार राधाकृष्‍ण विखे पाटील यांच्‍याकडे सुपूर्त केला.
विखे पाटील सहकारी साखर कारखान्‍याच्‍या संचालकांची मदत -
पद्मश्री डॉ. विठ्ठलराव विखे पाटील सहकारी साखर कारखान्‍याच्‍या संचालकांनी स्‍वनिधीतून ५५ हजार ५५५ रुपयांच्‍या मदतीचा धनादेश प्रवरा कोविड सेंटरसाठी आज सुपूर्त केला. याप्रसंगी कारखान्‍याचे व्‍हा. चेअरमन विश्‍वासराव कडू, संचालक रामभाऊ भुसाळ, संजय आहेर, कैलास तांबे, अशोक घोलप, देविचंद तांबे, सतिष ससाणे, साहेबराव म्‍हस्‍के, अॅड.भानुदास तांबे, डॉ. दिनकर गायकवाड, स्‍वप्निल निबे आदी उपस्थित होते.
श्री.गणेश सहकारी साखर कारखान्‍याच्‍या संचालक मंडळाची मदत -
श्री. गणेश सहकारी साखर कारखान्‍याच्‍या संचालक मंडळानेही स्‍वनिधीतून ५० हजार, गणेश विद्या प्रसारक मंडळाच्‍या वतीने २५ हजार आणि गणेश विद्या प्रसारक मंडळाच्‍या सेवकांच्‍या पतपेढीच्‍या वतीने २५ हजार रुपयांची मदत कोविड सेंटरसाठी देण्‍यात आली आहे. याप्रसंगी गणेश कारखान्‍याचे चेअरमन मुकंदराव सदाफळ, अॅड. रघुनाथ बोठे, जालिंदर निर्मळ, विजय गोर्डे, जी. आर. चोळके, नितीन गाढवे, मधुकर कोते, सुदामराव सरोदे, राजेंद्र थोरात, अभिजीत भागडे आदी उपस्थित होते.
वस्‍तुरुपाने मदत -
आर्थिक मदती व्‍यतिरिक्‍तही अनेकांनी वस्‍तुरुपाने या कोविड केअर सेंटरला मदतीचे सहकार्य सुरुच ठेवले आहे. डॉ.विखे पाटील कारखान्‍याचे माजी चेअरमन डॉ.भास्‍करराव खर्डे, डॉ.राहुल खर्डे यांनी आक्सिजन कॉन्‍सट्रेटरचे दोन सेट, प्रवरा ग्रामीण शिक्षण संस्‍थेच्‍या दाढ येथील महात्‍मा फुले विद्यालयातील माजी विद्यार्थ्‍यांनी १५० वेपोरायझर स्‍टिमर दिले आहेत,कोल्‍हार येथील खासदार डॉ.सुजय विखे पाटील युनायटेड फ्रंट यांच्‍यातर्फे दोन हजार अंडी, रविंद्र दिघे व विजय नालकर यांनी २० बॉक्‍स पीण्याच्या पाण्याच्या बाटल्या आणि छत्रपती शासन लोणी खुर्द यांच्‍यावतीने ७० बिस्‍कीटांचे बॉक्‍स कोविड सेंटरला दिले आहेत.
४८८ रुग्णांवर यशस्वी उपचार -
प्रवरा कोविड सेंटरमधून आत्‍तापर्यंत ४८८ रुग्‍ण यशस्वी उपचारानंतर घरी परतले आहेत. सध्‍या १९० रुग्‍ण या कोविड सेंटरमध्‍ये दाखल असून, समाजातील विविध घटकांकडून तसेच संस्‍थानकडून होत असलेल्‍या मदतरुपी सहकार्याने, आमदार राधाकृष्‍ण विखे पाटीलांच्‍या मार्गदर्शनाखाली प्रवरा ग्रामीण शिक्षण संस्‍था, प्रवरा परिवारातील विविध संस्‍थाच्‍या पुढाकाराने या कोविड सेंटरमधुन रुग्‍णांना सर्व आरोग्‍य सुविधा, दिली जात आहे. आवश्‍यकतेनुसार आक्सिजन बेडची सुविधाही उपलब्‍ध करून देण्‍यात आल्‍याने रुग्‍णांना मोठा दिलासा मिळाला आहे.
