अहमदनगर - नेवासे तालुक्यातील सोनई, करजगावसह 18 गावांची पाणी योजना तातडीने सुरू करावी व ती योजना सुरू होण्यापर्यंत या सर्व गावात पाण्याचे टँकर चालू करावेत, कामे पूर्ण झाली नसताना ठेकेदाराला दिलेल्या बिलाची चौकशी करावी, योजनेचे काम पूर्ण करून 1 वर्ष योजना प्राधिकरणाने चालवावी या मागण्यांसाठी माजी आमदार शंकरराव गडाख यांच्या नेतृत्वाखाली सुमारे 500 ग्रामस्थांनी नगर येथील जीवन प्राधिकरणाच्या ऑफिससमोर उपोषणाला बसले आहेत. यावेळी काही आंदोलक आक्रमक होत प्राधिकरणाच्या इमारतीवर चढून घोषणाबाजी केल्याने वातावरण तणावपूर्ण झाले होते.
या सर्व प्रश्नांकडे शासनाचे लक्ष वेधण्यासाठी 1 जुलै 2019 पासून बंद केलेली पाणी योजना पुन्हा सुरू करण्यासाठी गडाख यांच्यासमवेत 18 गावचे सरपंच व ग्रामस्थांनी सोनई येथे रस्ता रोको आंदोलन केले होते. त्यात जीवन प्राधिकरणाच्या अधिकाऱ्यांनी याबाबत लेखी आश्वासन दिले होते. परंतु यावर काहीही कारवाई झाली नाही. त्यामुळे हे सर्व ग्रामस्थ नगर येथे उपोषणाला बसलेले आहेत. या मागण्या पूर्ण होईपर्यंत उपोषण मागे घेणार नाही, असा आक्रमक पवित्रा आंदोलनकर्त्यांनी घेतला आहे.
प्राधिकरणाच्या ऑफिसमध्ये उपोषणकर्ते आले, त्यांनी तेथे ठिय्या मांडला व टाळ, मृदंगासह जप चालू केला. अधिकारी, ठेकेदार व नेवाशाचे आमदार यांच्याविरोधात घोषणाबाजी करण्यात आली. पंचायत समितीच्या सभापती कल्पना पंडित यांच्यासह 18 गावातील सरपंच, उप सरपंच, क्रांतिकारी पक्षाचे सर्व जिल्हा परिषद सदस्य, पंचायत समिती सदस्य यांच्यासह अनेक ग्रामस्थ उपस्थित होते.
माध्यमांशी बोलताना माजी आमदार शंकरराव गडाख म्हणाले की, राहुरी तालुक्यातील 3 गावांना अनधिकृतपणे कनेक्शन दिल्यामुळे नेवासा तालुक्यातील 18 गावांची पाणी योजना अडचणीत आली आहे. तसेच पूर्ण दाबाने पाणी येत नसल्याने टाक्याही भरत नाही. राहुरीचे गावं जोडण्यासाठी नेवशाच्या लोकप्रतिनिधींनी लेखी संमती दिली आहे. या योजनेचे छोटे मोठे कामे अपूर्ण असतानाही ठेकेदाराला पेमेंट दिले गेले आहे. यात मोठा भ्रष्टाचार झाला असून याची चौकशी करण्याची मागणी गडाखांनी केली आहे.
