अहमदनगर - भाजपा सेनेची युती गेल्या ३० वर्षांपासुन आहे. मात्र, यावेळी झालेली युती ही मागच्या युती पेक्षा अधिक घट्ट असल्याचे युवा सेनेचे अध्यक्ष आदित्य ठाकरे म्हणाले. कोपरगाव येथील जाहीर सभेत ते बोलत होते. दरम्यान, देशात महायुतीच्या सदस्यांचा आकडा किती असेल? याबाबत मात्र ते साशंक दिसून आले.
शिर्डी लोकसभेचे युतीचे उमेदवार सदाशिव लोखंडे यांच्या प्रचारासाठी आदित्य ठाकरेंची कोपरगाव येथे जाहीर सभा आयोजीत करण्यात आली होती. यावेळी संबोधीत करताना मोदींना निवडून देण्यासाठी महायुतीचे जास्तीत जास्त खासदार लोकसभेत निवडून जाणे गरजेचे असल्याचे ते म्हणाले. याचे उदाहरण देताना त्यांनी अटलबिहारी वाजपेयींचे सरकार केवळ एका मताने कोसळल्याचा दाखला दिला. शिवाय महायुतीला संसदेत किती जागा मिळवता येतील याबाबतही आदित्या ठाकरे साशंक वाटले. युतीचे ३०० खासदार निवडून येऊ शकतात असे सांगाताना त्यांनी युतीला कदाचीत २७२ किंवा २०० जागांवरच समाधान मानावं लागू शकते, असे संदिग्ध वक्तव्य केले. यावरून आदित्य ठाकरे स्वत: महायुतीचे सरकार बहुमतात येणार किंवा नाही याबाबत ठाम नसल्याचे जाणवले.
या वेळी ठाकरेंनी राष्ट्रवादी काँग्रेसवर टिका करतांना भ्रष्टवादी काँग्रेस असा उल्लेख केला. महाराष्ट्रात फक्त भगवी लाट आहे. स्वतःची कामे न करता लोकांची कामे आमच्या खासदारांनी केली. भ्रष्टवादी काँग्रेसमागे जायला कोणीही तयार नाही. त्यांनी केलेली भ्रष्ट कामे सुधारण्याचे काम आम्हाला कराव लागत असल्याचे ते म्हणाले.
कोपरगावचा पाणीप्रश्न सोडविण्यासाठी कुठे जाण्याची वेळ आली, तर मी स्वतः येईल असे अश्वासन आदित्य ठाकरे यांनी उपस्थितांना दिले. दरम्यान, यावेळी भाऊसाहेबांनी धोका दिला असे सांगत भाजपशी बंडखोरी करणारे उमेदवार भाऊसाहेब वाकचौरेंवरही त्यांनी टीका केली. तुमचे प्रत्येक मत हे महत्वाच आहे. मतदान हे तुमचा सर्वात मोठा हक्क आहे. तो तुम्ही बजावा. त्यामुळे चांगले लोक निवडून येतात. असे आवाहन त्यांनी केले. काँग्रेस ३७० कलम तसेच ठेवणार, १२४ कलम काढणार, काश्मीरसाठी वेगळा राष्ट्रपती, ध्वज, पंतप्रधान करणार. ते तुम्हाला मान्य आहे का? असा सवाल त्यांनी उपस्थीतांना केला.
