मेलबर्न - टेनिस जगतातील दिग्गज खेळाडू रॉजर फेडररने पुढील वर्षी होणाऱ्या ऑस्ट्रेलिया ओपन स्पर्धेतून माघार घेतली आहे. फेडररच्या गुडघ्याला दुखापत झाली आहे. यामुळे त्याने हा निर्णय घेतला आहे.
टोनी गॉडसिक यांनी सांगितले की, 'फेडररने २०२१ ऑस्ट्रेलिया ओपन स्पर्धेतून माघार घेण्याचा निर्णय घेतला आहे. त्याला मागील काही महिन्यापासून गुडघ्याचा त्रास होत आहे. यातून सावरण्यासाठी तो प्रयत्न करत आहे. दुखापतीतून सावरल्यानंतर जोमात पुनरागमन करण्यासाठी त्याने हा निर्णय घेतला आहे. एटीपी टूर स्पर्धेतून तो वापसी करण्याची योजना आखत आहे.'
कोरोनाच्या प्रादुर्भावामुळे ऑस्ट्रेलिया ओपन स्पर्धा यंदा तीन आठवडे उशिरा खेळवण्यात येणार आहे. या स्पर्धेला पुढील वर्षी ८ फेब्रुवारीपासून मेलबर्न पार्कमध्ये सुरूवात होणार आहे. फेडरर सद्या दुबईमध्ये फिटनेसकडे लक्ष देत आहे. त्याने ऑस्ट्रेलिया ओपन २०२० नंतर एकही स्पर्धा खेळलेली नाही.
अँडी मरे याला वाईल्ड कार्ड प्रवेश -
तीन वेळा ग्रँडस्लॅम विजेता ब्रिटनचा टेनिसपटू अँडी मरेला वर्षाची पहिली ग्रँडस्लॅम स्पर्धा ऑस्ट्रेलिया ओपनसाठी वाईल्ड कार्ड प्रवेश देण्यात आला आहे. नवीन वर्षात आठ फेब्रुवारीपासून ऑस्ट्रेलियन ओपनची सुरुवात होत आहे. या स्पर्धेत पाच वेळा उपविजेता ठरलेल्या मरेला मागील वर्षी पहिल्याच फेरीत गाशा गुंडाळावा लागला होता. पहिल्या फेरीतील पाच सेट सामन्यात स्पेनच्या रॉबर्टो बटिस्टा अगुटने मरेला स्पर्धेबाहेर केले होते.
हेही वाचा - मॅच फिक्सिंग : युक्रेनच्या टेनिसपटूवर आजीवन बंदी
हेही वाचा - ऑस्ट्रेलियन ओपन : टेनिसपटू अँडी मरेला थेट प्रवेश
