बर्मिंगहॅम: अभिषेक वर्मा ( Archer Abhishek Verma ) आणि ज्योती सुरेखा वेनम ( Jyoti Surekha Venam ) यांच्या भारतीय मिश्र संघाने 2022 च्या जागतिक क्रीडा स्पर्धेत त्यांच्या मेक्सिकन प्रतिस्पर्ध्यांचा एका गुणाने पराभव करत तिरंदाजीमध्ये कांस्यपदक ( India won bronze medal in archery ) जिंकले. पहिल्या फेरीत आघाडी घेण्यासाठी भारतीय जोडीने चांगली सुरुवात केली, पण अँड्रिया बेसेरा आणि मिगुएल बेसेरा ( Andrea Besera and Miguel Besera ) यांनी दुसऱ्या फेरीत चांगली कामगिरी करत गुणसंख्या बरोबरीत आणली. त्यानंतर अभिषेक आणि ज्योतीने तिसऱ्या फेरीत पुनरागमन केले आणि अंतिम फेरीत चमकदार कामगिरी करत कांस्यपदकाचा प्ले-ऑफ सामना 157-156 असा जिंकला.
तिरंदाजी असोसिएशन ऑफ इंडिया ( Archery Association of India ) च्या निवेदनानुसार, जागतिक खेळांमधील हे भारताचे पहिले पदक आहे. तसेच माजी विश्वचषक सुवर्णपदक विजेता अभिषेकचे 50 वे आंतरराष्ट्रीय पदक आहे. सर्व स्तरांवर कंपाऊंड तिरंदाजीमध्ये पदक जिंकणारा अभिषेक हा एकमेव भारतीय तिरंदाज आहे.
त्याने वर्ल्ड गेम्स, वर्ल्ड चॅम्पियनशिप, वर्ल्ड कप फायनल्स, वर्ल्ड कप, एशियन गेम्स आणि एशियन चॅम्पियनशिपमध्ये पदके जिंकली आहेत. वैयक्तिक विभागात मात्र अभिषेकने निराशा केली. उपांत्यपूर्व फेरीत जागतिक क्रमवारीत अव्वल स्थानी असलेल्या अमेरिकेच्या माईक श्लोसरचा पराभव करणाऱ्या वर्माला उपांत्य फेरीचा अडथळा पार करण्यात अपयश आले.
जागतिक क्रमवारीत त्याच्यापेक्षा एका स्थानाने सरस असलेल्या फ्रान्सच्या चौथ्या क्रमांकाच्या जीन-फिलीप बोल्चकडून त्याला 141-143 असा पराभव पत्करावा लागला. त्यानंतर कांस्यपदकाच्या प्ले-ऑफ सामन्यात वर्माला खालच्या मानांकित कॅनडाच्या क्रिस्टोफर पार्किन्सनकडून 145-148 असा पराभव पत्करावा लागला.
हेही वाचा - Dhoni Meets Team India : एमएस धोनीने एजबॅस्टनमध्ये घेतली भारतीय संघाची भेट
