कोलकाता - भारतीय टेबल टेनिस महासंघाने (टीटीएफआय)अव्वल महिला टेटेपटू मनिका बत्रा हिची राजीव गांधी खेलरत्न पुरस्कारासाठी शिफारस केली. खेलरत्नसाठी मनिकाचे नाव पाठवण्याची ही दुसरी वेळ आहे. राष्ट्रकुल स्पर्धेतील एकेरीत सुवर्णपदक जिंकणारी ती भारताची पहिली महिला खेळाडू आहे.
टीटीएफआयचे सरचिटणीस खासदार सिंग यांनी ही माहिती दिली. मनिकाने 2018 मध्ये झालेल्या राष्ट्रकुल स्पर्धेत दोन सुवर्ण पदकांसह एकूण चार पदके जिंकली होती. 24 वर्षीय मनिकाने टेबल टेनिसमध्ये भारताला प्रथमच सुवर्णपदक मिळवून देण्यात महत्त्वपूर्ण भूमिका बजावली. या स्पर्धेतील मिश्र दुहेरीत अचंता शरथ कमलसह तिला रौप्यपदक जिंकण्यातही यश आले.
अर्जुन पुरस्कारासाठी टीटीएफआयने मधुरिका पाटकर, मानव ठक्कर आणि सुरिता मुखर्जी यांची नावे पाठवली आहेत. प्रशिक्षक जयंता पुशीलाल आणि एस. रमण यांना द्रोणाचार्य पुरस्कारासाठी नामांकन देण्यात आले आहे.
हॉकी इंडियाने राजीव गांधी खेलरत्न पुरस्कारासाठी भारताच्या महिला हॉकी संघाची कर्णधार राणी रामपालची शिफारस केली आहे. राणीव्यतिरिक्त वंदना कटारिया, मोनिका आणि हरमनप्रीत सिंग यांना अर्जुन पुरस्कारासाठी नामांकन देण्यात आले आहे. तर, बॉक्सिंग फेडरेशन ऑफ इंडियाने (बीएफआय) प्रतिष्ठित राजीव गांधी खेलरत्न पुरस्कारासाठी अमित पांघल आणि विकास कृष्णन यांची शिफारस केली आहे.
