नवी दिल्ली - किडनीच्या समस्येने ग्रस्त असलेला भारताचा युवा फुटबॉलपटू रामानंद निंगथौजमला क्रीडा मंत्रालय ५ लाखांची मदत देणार आहे. मणिपूरचा रहिवासी असलेल्या रामानंदने अनेक आंतरराष्ट्रीय स्पर्धांमध्ये भारताचे प्रतिनिधित्व केले आहे. रिक्षाचालकाचा मुलगा असलेला रामानंद सध्या मणिपूरच्या शिजा हॉस्पिटलमध्ये आहे.
रामानंद मूत्रपिंड व्यतिरिक्त डोळ्यांच्या समस्येनेही ग्रस्त आहे. त्यांचे कुटुंबीय उपचार घेण्यास असमर्थ आहेत. त्यामुळे क्रीडामंत्री किरेन रिजिजू यांनी रामानंदला मदतीचा हात पुढे केला असून त्यांनी पंडित दिनदयाल उपाध्याय राष्ट्रीय कल्याण निधीतून रामानंदला मदत करण्याचा निर्णय घेतला आहे. हा निधी फक्त खेळाडूंसाठी जमवण्यात येतो.
एका निवेदनात रिजिजू म्हणाले, "आपल्या खेळाडूंसाठी सरकारची चांगली प्राथमिकता आहे. रामानंदने अनेक प्रसंगी भारताचे प्रतिनिधित्व केले आहे. खेळाडू हे फक्त राष्ट्राची संपत्ती नव्हे तर प्रतिकही असतात. त्यामुळे मैदानावर आणि मैदानाबाहेरच्या उत्तम सुविधा देणे महत्वाचे आहे.''
रामानंदने १७ वर्षांखालील आशियाई फुटबॉल स्पर्धेत भारताचे प्रतिनिधित्व केले. याशिवाय तो १२ आणि १३ वर्षांखालील राष्ट्रीय सब-ज्युनियर चॅम्पियनशिप २०१३ आणि १५ वर्षांखालील राष्ट्रीय स्पर्धेतही खेळला आहे.
