मेलबर्न - ऑस्ट्रेलियाचा कर्णधार टिम पेन कसोटी क्रिकेटमध्ये वेगवान १५० बळी घेणारा यष्टीरक्षक ठरला आहे. भारत आणि ऑस्ट्रेलिया दरम्यान सुरू असलेल्या दुसर्‍या कसोटी सामन्याच्या दुसर्‍या दिवशी पेनने ही कामगिरी केली. सामन्याच्या ६०व्या षटकात रिषभ पंतचा झेल घेत त्याने हा पराक्रम केला.
हेही वाचा - भारतीय ग्रँडमास्टर हरिकृष्णाची जगज्जेत्या कार्लसनसोबत बरोबरी
३६ वर्षीय पेनने यष्टीरक्षक म्हणून केवळ ३३ डावात कसोटी क्रिकेटमध्ये १५० बळी पूर्ण केले आहेत. त्याआधी दक्षिण आफ्रिकेचा यष्टीरक्षक क्विंटन डिकॉकला ३४ डावांमध्ये ही कामगिरी करता आली आहे. ऑस्ट्रेलियाचा माजी यष्टीरक्षक अ‍ॅडम गिलख्रिस्टने ३६ डावांमध्ये हा पराक्रम केला होता.
स्टार्कची २५०वी विकेट -
पंतची विकेट ही मिचेल स्टार्कची कसोटी क्रिकेटमधील २५०वी विकेट आहे. कसोटीत २५० विकेट घेणारा तो ऑस्ट्रेलियाचा नववा गोलंदाज ठरला आहे. आपल्या कारकीर्दीतील ५९व्या कसोटी सामन्यात स्टार्कने २५० बळी पूर्ण केले आहेत.
ऑस्ट्रेलियाकडून कसोटी क्रिकेटमध्ये सर्वाधिक विकेट घेणाऱ्या खेळाडूंमध्ये शेन वॉर्न अव्वल स्थानी आहे. कसोटीत त्याने ७०८ बळी घेतले आहेत. त्याच्यापाठोपाठ ग्लेन मॅकग्रा (५६३), नॅथन लायन (३९२), डेनिस लिली (३५५), मिचेल जॉन्सन (३१३), ब्रेट ली (३१०), क्रेग मॅकडर्मॉट (२९१), जेसन गिलेस्पी (२५९) आणि मिचेल स्टार्क (२५०) हे गोलंदाज आहेत.
