केपटाऊन (द. आफ्रिका) : आठवा महिला टी-20 विश्वचषक सध्या रोमांचक टप्प्यात पोहोचला आहे. उपांत्य फेरीत स्थान निश्चित करण्यासाठी भारतीय संघ आज आयर्लंडशी भिडणार आहे. भारत विरुद्ध आयर्लंड यांच्यातील सामना सेंट जॉर्ज पार्क गेकेबेरा येथे संध्याकाळी 6.30 वाजता होणार आहे. भारतीय महिला संघाने विश्वचषक स्पर्धेत आतापर्यंत दोन सामने जिंकले आहेत. 18 फेब्रुवारीला इंग्लंडविरुद्ध झालेल्या सामन्यात भारताला 11 धावांनी पराभव पत्कारावा लागला होता.
हेड टू हेड : भारतीय महिला संघ जागतिक क्रमवारीत चौथ्या स्थानावर आहे. तर आयर्लंडचा संघ दहाव्या स्थानावर आहे. भारत आणि आयर्लंड यांच्यात आतापर्यंत केवळ एकच सामना खेळला गेला आहे. या सामन्यात भारताने आयर्लंडचा 52 धावांनी पराभव केला होता. 15 नोव्हेंबर 2018 रोजी महिला विश्वचषक स्पर्धेत दोन्ही संघ आमनेसामने आले होते. या सामन्यात मिताली राजने 56 चेंडूत 51 धावा केल्या होत्या. या प्रदर्शनासाठी तिला सामनावीर म्हणून गौरवण्यात आले होते. गेल्या पाच टी-20 सामन्यांबद्दल बोलायचे झाल्यास, भारताने तीन जिंकले आहेत आणि दोन गमावले आहेत. आयर्लंडच्या संघाला गेल्या पाच सामन्यांपैकी केवळ एकच सामना जिंकता आला आहे.
उपांत्य फेरीच्या मार्गात पाकिस्तानचा अडथळा : कर्णधार हरमनप्रीत कौरच्या नेतृत्वाखालील भारतीय संघाकडे आयर्लंडसारख्या कमकुवत संघाला पराभूत करण्याची कुवत आहे. परंतु तरीही उपांत्य फेरीतील भारताचा मार्ग सोपा नाही. भारताला उपांत्य फेरी गाठण्यासाठी पाकिस्तान वर अवलंबून राहावे लागणार आहे. मंगळवारी (21 फेब्रुवारी) पाकिस्तानची लढत इंग्लंडशी होणार आहे. या सामन्यात जर पाकिस्तानचा पराभव झाला तर भारताला पुढे जाण्याची संधी आहे.
भारताचा नेट रनरेट चांगला : भारत सध्या ग्रुप 2 मध्ये चार गुणांसह दुसऱ्या स्थानावर आहे. तर इंग्लंडचा संघ तिन्ही सामने जिंकून ६ गुणांसह अव्वल स्थानावर आहे. त्याचबरोबर पाकिस्तान तीनपैकी एक सामना जिंकून 2 गुणांसह चौथ्या स्थानावर आहे. वेस्ट इंडिजने आपले चार सामने खेळले आहेत, ज्यात दोन हरले आहेत आणि दोन जिंकले आहेत. नेट रन रेटच्या बाबतीत भारत सध्या दुसऱ्या क्रमांकावर आहे. त्यामुळे भारताला उपांत्य फेरी गाठण्याची आशा आहे.
हेही वाचा : Ind Vs Aus 2nd Test : दुसऱ्या सामन्यातील पराभवानंतर ऑस्ट्रेलियन मीडिया आणि माजी खेळाडूंची संघावर जोरदार टीका
