नवी दिल्ली - ऑस्ट्रेलिया क्रिकेट संघाचा माजी फिरकी गोलंदाज ब्रॅड हॉगने अनुभवी ऑफस्पिनर रवीचंद्रन अश्विनला इंग्लंडविरूद्ध आगामी एकदिवसीय मालिकेसाठी संघात स्थान देण्यात यावे, अशी इच्छा व्यक्त केली आहे. अश्विन भारताच्या एकदिवसीय संघात असावा का?, असा सवाल एका चाहत्याने हॉगला विचारला होता. त्यावर हॉगने आपली प्रतिक्रिया दिली.
सोशल मीडियावर खूप सक्रिय असणारा हॉग म्हणाला, ''मला वाटते की हा चांगला विचार आहे. यामुळे फलंदाजीत सखोलता येईल. शिवाय, फलंदाजांची वरची फळी अधिक सक्षम होईल. याशिवाय तो गोलंदाजीतही उजवा आहे. त्याची सरासरीही उत्तम आहे. अश्विन एकदिवसीय संघात परतला पाहिजे.''
