मुंबई - भारतीय क्रिकेट संघ विदेशी खेळपट्टीवर आपला पहिला 'डे-नाईट' कसोटी सामना खेळणार आहे. सिडनी क्रिकेट मैदानावर (एससीजी) 3 ते 7 जानेवारी 2021 ला हा सामना रंगणार आहे. क्रिकेट ऑस्ट्रेलियाने बुधवार भारताविरुद्धच्या कसोटी मालिकेचे वेळापत्रक जाहीर केले. भारतीय संघ डिसेंबर महिन्यात ऑस्ट्रेलिया दौऱ्यावर जाणार आहे. या दौऱ्यात उभय संघात 4 कसोटी सामन्याची कसोटी मालिका खेळवण्यात येणार आहे.
क्रिकेट ऑस्ट्रेलियाने जाहीर केलेल्या वेळापत्रकानुसार, उभय संघातील पहिला कसोटी सामन्याला 3 डिसेंबरपासून सुरुवात होईल. हा सामना ब्रिस्बेन येथे होणार आहे. त्यानंतर 11 डिसेंबरला अ‌ॅ‌‌‌‌‌डलेड येथे दुसरा, 26 डिसेंबरला मेलबर्न येथे तिसरा आणि 3 जानेवारी 2021 मध्ये सिडनी येथे चौथा कसोटी सामना खेळवण्यात येणार आहे.
ऑस्ट्रेलियाने आतापर्यंत एकूण सात डे-नाईट कसोटी सामने खेळले आहेत आणि सर्व जिंकले आहेत. मागील वर्षी बांगलादेशविरुद्ध भारताने डे-नाईट कसोटी सामना खेळला होता.
यापूर्वी, जेव्हा टीम इंडिया 2018-19 मध्ये ऑस्ट्रेलियाच्या दौर्‍यावर गेली होती तेव्हा ऑस्ट्रेलियन क्रिकेट बोर्डाने भारताला डे-नाईट टेस्टची ऑफर दिली होती. पण भारतीय क्रिकेट नियामक मंडळाने (बीसीसीआय) ही ऑफर नाकारली. या दौऱ्यात तीन सामन्याची कसोटी मालिका खेळवण्यात आली. ही मालिका भारताने 2-1 च्या फरकाने जिंकली. पण, या मालिकेसाठी ऑस्ट्रेलिया संघात स्टिव्ह स्मिथ आणि डेव्हिड वॉर्नर यांचा समावेश नव्हता. त्यांच्यावर चेंडू छेडछाड केल्याप्रकरणी बंदी घालण्यात आली होती.
