विराट सचिनचे सर्व विक्रम मोडेल, पाकच्या माजी दिग्गज गोलंदाजाचं भाकित

विराट सद्या जगातील सर्वोत्तम फलंदाज म्हणून ओळखला जातो. विराटच्या फलंदाजीवर जगभरातील क्रिकेटप्रेमींसह पाकिस्तानचे माजी दिग्गज खेळाडू सरफराज नवाझही खूश आहे. त्यांनी विराट सचिनचे सर्व विक्रम मोडेल असे भाकित वर्तवलं आहे.

मुंबई - भारतीय संघाचा कर्णधार विराट कोहलीने सातत्यपूर्ण कामगिरी करत अनेक विक्रमांना गवसणी घातली आहे. यामुळेच त्याची तुलना मास्टर ब्लास्टर फलंदाज सचिन तेंडुलकरशी केली जात आहे. विराटने सचिनचे अनेक विक्रमही मोडीत काढले आहे. विराट सद्या जगातील सर्वोत्तम फलंदाज म्हणून ओळखला जातो. विराटच्या फलंदाजीवर जगभरातील क्रिकेटप्रेमींसह पाकिस्तानचे माजी दिग्गज खेळाडू सरफराज नवाझही खूश आहे. त्यांनी विराट सचिनचे सर्व विक्रम मोडेल असे भाकित वर्तवलं आहे.

सरफराज यांनी एका इंग्रजी दैनिकाला दिलेल्या मुलाखतीमध्ये, विराट कोहली आणि सचिन तेंडुलकर यांच्यातील तुलनेबाबत मोठं विधान केलं. ते म्हणाले, 'विराट कोहलीची तुलना जगातील कोणत्याही खेळाडूशी होऊ शकत नाही. तो सचिन तेंडुलकरला सर्व आघाडींमध्ये मागे टाकतो. इनस्विंग चेंडूवर खेळताना सचिन चाचपडायचा. पण विराट इनस्विंगवर सहजतेनं फलंदाजी करतो. विराटही कारकिर्दीच्या सुरुवातीला इनस्विंगवर चाचपडायचा, परंतु आता तो फलंदाजीत तरबेज झाला आहे.'

सचिनने आंतरराष्ट्रीय क्रिकेटमध्ये ३४ हजाराहून अधिक धावा केल्या आहेत. याशिवाय त्याच्या नावावर आंतरराष्ट्रीय क्रिकेटमध्ये शंभर शतकं करण्याचा विक्रम जमा आहे. दरम्यान, सध्या कोरोनामुळे उद्भवलेल्या परिस्थितीमुळे सर्व क्रिकेट स्पर्धा रद्द करण्यात आलेल्या आहेत. बीसीसीआयने आयपीएलचा तेरावा हंगामही पुढील सूचना मिळेपर्यंत स्थगित केला आहे. यामुळे सर्व खेळाडू आपापल्या घरीच कुटुंबीयांसोबत वेळ घालवत आहेत.

हेही वाचा - अम्फान चक्रीवादळाचा कहर, विराटसह क्रिकेटपटूंनी खेळाडूंनी केली पीडितांसाठी प्रार्थना

हेही वाचा - आयपीएल 2020 बाबत बीसीसीआयचे सीईओ राहुल जोहरींनी दिली महत्वपूर्ण अपडेट, वाचा काय म्हणाले...