दुबई - आज आयपीएलमध्ये रॉयल चॅलेंजर्स बंगळुरू आणि मुंबई इंडियन्स यांच्यात लढत होत आहे. गतविजेत्या मुंबईला सामोरे जाण्यासाठी बंगळुरू सज्ज झाला असला तरी, त्यांच्यासमोर कामगिरीतील सातत्य हे मोठे आव्हान असणार आहे. तर, दुसरीकडे रोहित शर्माच्या नेतृत्वाखालील मुंबई इंडियन्स संघाने पहिल्या लढतीतील पराभवानंतर शानदार पुनरागमन केले. संघाने कोलकाता नाईट रायडर्सविरुद्ध शानदार विजय मिळवला आहे.
आजच्या सामन्यात मुंबईचा कर्णधार रोहितला मोठा विक्रम खुणावतो आहे. विराटसेनेविरुद्ध १० धावा जमवल्यास रोहित आयपीएलमध्ये आपल्या ५००० धावा पूर्ण करणार आहे. रॉयल चॅलेंजर्स बंगळुरूचा कर्णधार विराट कोहली आणि चेन्नई सुपर किंग्जचा फलंदाज सुरेश रैना यांचा या विक्रमात आधीच समावेश झाला आहे.
आयपीएलमध्ये सर्वाधिक धावा करणाऱ्या फलंदाजांच्या यादीत रोहित सध्या ४,९९० धावाांसह तिसर्‍या स्थानावर आहे. विराट कोहलीने १७८ सामन्यात ३७.६८च्या सरासरीने ५४२६ धावा केल्या आहेत. तर रैनाने १९३ सामन्यांत ३३.३४ च्या सरासरीने ५३६८ धावा केल्या आहेत.
कोलकाताविरुद्ध झालेल्या सामन्यात रोहितने ६ षटकारांसह ८० धावांची खेळी केली. रोहितने आयपीएल कारकिर्दीत २०० षटकार ठोकण्याचा पराक्रम गाजवला. आयपीएलमध्ये अशी कामगिरी करणारा तो आजवरचा चौथा फलंदाज ठरला. याआधी ख्रिस गेल, एबी डिव्हिलियर्स आणि महेंद्रसिंह धोनीने आयपीएलमध्ये २००पेक्षा जास्त षटकार ठोकले आहेत.
