कराची - पाकिस्तानचा डावखुरा फिरकी गोलंदाज रझा हसनला कोरोनासंबंधित प्रोटोकॉल तोडल्यामुळे देशाच्या स्थानिक हंगामाच्या उर्वरित सामन्यांमधून वगळण्यात आले आहे. बोर्डाच्या वैद्यकीय पथकाच्या परवानगीशिवाय स्थानिक हॉटेलमध्ये गेल्यामुळे आणि जैव सुरक्षित वातावरणाचे नियम तोडल्यामुळे रझा हसनला ही शिक्षा मिळाली. हंगामाच्या इतर कोणत्याही सामन्यात तो खेळू शकणार नाही.
हेही वाचा - पाकिस्तानच्या खेळाडूने मोडला कोरोना प्रोटोकॉल, मिळाली 'जबर' शिक्षा
पाकिस्तान क्रिकेट बोर्डाचे (पीसीबी) नदीम खान यांनी ही माहिती दिली. ते म्हणाले, ''कोरोनासंबधित प्रोटोकॉलचे अनुसरण करण्याचे महत्त्व बर्‍याचदा सांगितले गेले आहे. शिवाय, जनजागृती मोहीम राबवली गेली आहे, परंतु रझा हसनने उल्लंघन केले. त्यामुळे रझा हसनला स्पर्धेतून वगळण्यात आले आहे. यापुढे त्याला उर्वरित हंगामात खेळण्याची परवानगी दिली जाणार नाही."
रझा आणि वर्ल्डकप -
२०१२च्या टी-२० वर्ल्डकपदरम्यान रझा हसन नावारुपास आला होता. या स्पर्धेत त्याने ऑस्ट्रेलियाविरुद्धच्या सामन्यात ग्लेन मॅक्सवेल आणि शेन वॉटसनला बाद केले. त्याने आत्तापर्यंत फक्त १० आंतरराष्ट्रीय टी-२० आणि एक एकदिवसीय सामना खेळला आहेत.
न्यूझीलंड दौऱ्यावर गेलेल्या पाकिस्तान संघातील सात सदस्य कोरोना पॉझिटिव्ह आढळले आहेत. न्यूझीलंडला पोहोचल्यानंतर या सदस्यांनी नियमांचे उल्लंघन केले. त्यामुळे असे रतल केल्यास संघ परत पाठवला जाईल, असे त्यांना सांगण्यात आले आहे.
