कराची - श्रीलंका विरुध्दच्या टी-२० सामन्यात पाकिस्तानचा युवा गोलंदाज मोहम्मद हसनैनने इतिहास रचला आहे. त्याने या सामन्यात हॅट्रीक घेतली असून असा कारनामा करणारा तो जगातील सर्वात युवा गोलंदाज ठरला आहे.
१९ वर्षीय मोहम्मद हसनैनने श्रीलंका विरुध्दच्या पहिल्या टी-२० सामन्यात असा कारनामा केला. हसनैनने १६ व्या षटकातील शेवटच्या चेंडूवर लंकेचा फलंदाज भनुका राजपक्षा याला बाद केले. त्यानंतर त्याने १९ व्या षटकातील पहिल्या चेंडूवर दसुन शनाका आणि दुसऱ्या चेंडूवर शेहान जयसुर्या यांना बाद करत हॅट्ट्रीक साधली.
यापूर्वी असा कारनामा पाकच्याच फहिम असरफ याने केला होता. फहिमने २०१७ साली श्रीलंकेविरुध्द हॅट्ट्रीक घेतली होती. त्याचा हा विक्रम हसनैन याने मोडला. महत्वाचे म्हणजे, हसनैन याचा जन्म हैदराबाद येथे झाला आहे. दरम्यान, सर्वात कमी वयात हॅट्रीक विकेट घेण्याची किमया पाकच्या अकिब जावेद यांनी केली आहे.
अकिब जावेद यांनी १९९१ मध्ये, १९ वर्ष ८१ दिवस वय असताना भारताविरुध्द हॅट्रीक घेतली होती. मात्र, हा सामना आंतरराष्ट्रीय एकदिवसीय सामना होता. पण, आज टी-२० सामन्यात हसनैन याने आपले वय १९ वर्ष १८३ दिवस असताना ही किमया साधली आहे.
दरम्यान, या सामन्यात श्रीलंकेच्या संघाने निर्धारीत २० षटकात ५ बाद १६५ धावा केल्या होत्या. याला प्रत्युत्तराने, पाकिस्तानचा संघ अवघ्या १०१ धावांवर आटोपला. श्रीलंकेने हा सामना ६४ धावांनी जिंकला.
हेही वाचा - रोहित शर्माने भरमैदानात हासडली पुजाराला शिवी, व्हिडिओ व्हायरल
हेही वाचा - मराठमोळा अजिंक्य बनला 'बाप', पत्नी राधिकाने दिला गोंडस मुलीला जन्म
