कराची - श्रीलंका विरुध्दच्या एकदिवसीय सामन्यात पाकिस्तानचा भरवशाचा फलंदाज बाबर आझमने शतक ठोकत एक अनोखा विक्रम आपल्या नावे केला. महत्वाचे म्हणजे, बाबरने भारतीय कर्णधार विराट कोहलीला पाठीमागे टाकत हा खास विक्रम केला आहे. लंकेविरुध्दच्या शतकानंतर बाबर सर्वात कमी सामन्यांमध्ये ११ शतके ठोकणारा,
आशिया खंडातील पहिलाच फलंदाज ठरला आहे.
पाकिस्तानमध्ये श्रीलंका विरुध्द यजमान पाकिस्तान संघामध्ये तीन एकदिवसीय सामन्यांची मालिका रंगली आहे. या मालिकेतील पहिला सामना पावसामुळे रद्द झाला. त्यानंतर आज खेळवण्यात आलेल्या दुसऱ्या सामन्यात पाकिस्तानने प्रथम फलंदाजी करताना निर्धारीत ५० षटकात ७ बाद ३०५ धावा केल्या. यात बाबर आझमने १०५ चेंडूत ८ चौकार आणि ४ षटकारांच्या मदतीने ११५ धावांची खेळी केली. बाबरचे हे ११ वे शतक आहे.
हेही वाचा - नाणेफेकीसाठी चक्क तीन कर्णधार मैदानात, क्रिकेटमध्ये घडला विचित्र प्रकार
दरम्यान, यापूर्वी भारतीय कर्णधार विराट कोहलीने ८२ सामन्यात ११ शतकं केली आहेत. मात्र, विराटचा हा रेकॉर्ड बाबरने ७१ सामन्यात ११ शतकं ठोकत तोडला आहे. या यादीत प्रथम क्रमांकावर दक्षिण आफ्रिकेचा माजी फलंदाज हाशिम आमला असून त्याने हा पराक्रम ६४ सामन्यात केला आहे. त्यानंतर आफ्रिकेच्याच क्विंटन डी कॉकचा नंबर येतो. त्याने हा पराक्रम ६५ सामन्यात केला आहे.
हेही वाचा - 'त्या' सेंच्युरीसाठी वापरली सचिनची बॅट, आजही आफ्रिदीच्या घरी
