पुणे - बारामतीमध्ये बीसीसीआयने राज्यस्तरीय व रणजी सामने खेळवण्यासाठी मान्यता दिली आहे. त्यामुळे लवकरच बारामतीच्या भारतरत्न डॉ. बाबासाहेब आंबेडकर स्टेडियमवर क्रिकेटचे सामने रंगताना दिसणार आहेत. भारताचा अष्टपैलू खेळाडू आणि मराठमोळ्या केदार जाधवने या मैदानावर प्रतिक्रिया दिली आहे.
बारामती येथील डॉ. बाबासाहेब आंबेडकर मैदानावर महाराष्ट्र 'अ' विरुध्द महाराष्ट्र 'ब' संघामध्ये झालेल्या सामन्यात केदार जाधवचा खेळ बारामतीकरांना पाहता आला. सामन्यानंतर केदार म्हणाला, 'आंबेडकर स्टेडियम मधील धावपट्टी आणि मैदान उच्च दर्जाचे असून आमच्या सारख्या खेळाडूंना नक्कीच उत्साह देणारे आहे. या मैदानावर जास्तीत जास्त सामने व्हावेत, तसेच या भागातील जास्तीत जास्त खेळाडू महाराष्ट्रासह भारतासाठी खेळावेत आणि बारामती सारख्या ग्रामीण भागात आंतरराष्ट्रीय दर्जाचे स्टेडियम क्रिकेट प्रेमींसाठी खुले झाल्याने या स्टेडियममधून लवकरच उदयोन्मुख क्रिकेटपटू निर्माण होतील असा, विश्वास त्याने व्यक्त केला.
बारामती आणि परिसरात मोठ्या प्रमाणात क्रिकेट प्रेमी व क्रिकेटपट्टू आहेत. मात्र त्यांना आजवर चांगल्या दर्जाचे मैदान व खेळपट्टी मिळत नसल्याची खंत होती. आता डॉ. बाबासाहेब आंबेडकर स्टेडियमला बीसीसीआयने आंतरराष्ट्रीय खेळपट्टीचा दर्जा दिला असल्याने या मैदानातून क्रिकेटपट्टूंना आपले कौशल्य विकसित करता येणार असल्याने आनंद व्यक्त केला जात आहे.
मैदानाची वैशिष्ट्ये -
- मुख्य ग्राउंडचा परीघ - ४०० रनिंग मीटर
- मुख्य ग्राउंडचे एकून क्षेत्रफळ - १२३०० चौरस मीटर
- मुख्य खेळपट्ट्या- ८ आणि सरावासाठी १४
- खेळाडूंच्या सुरक्षेसाठी चेन लिंक फेन्सिंग
- प्रवेशद्वार - चार
- आसनक्षमता - ४३५० व्यक्ती
