दुबई - दिल्ली कॅपिटल्स संघाने सोमवारी रॉयल चॅलेंजर बंगळुरूचा ५९ धावांनी पराभव करत, चौथ्या विजयाची नोंद केली. या विजयासह दिल्लीने गुणतालिकेत अव्वलस्थान काबीज केले. दिल्ली विरुद्ध बंगळुरू सामन्यानंतर गुणतालिकेत कोणते बदल झाले, पाहा...
दिल्ली विरुद्ध बंगळुरू या सामन्यापूर्वी दिल्लीचा संघ गुणतालिकेत दुसऱ्या क्रमांकावर होता. या यादीत मुंबईचा संघ पहिल्या स्थानावर होता. दिल्लीने यापूर्वी झालेल्या चार मधील तीन सामन्यामध्ये विजय मिळवले होते, तर एक पराभव त्यांच्या पदरी पडलेला होता. शनिवारी दिल्लीने आरसीबीचा पराभव करत अव्वल स्थान पटकावले.
दुसरीकडे या सामन्यापूर्वी आरसीबीचा संघ तिसऱ्या स्थानावर होता. त्यामुळे त्यांना हा सामना जिंकून अव्वल स्थानावर जाण्याची नामी संधी होती. यापूर्वी आरसीबीने चार सामन्यात तीन विजय मिळवले होते. पण बंगळुरूला दिल्लीकडून पराभव पत्करावा लागला. त्यामुळे त्यांना तिसऱ्या स्थानावरच समाधान मानावे लागले.
