मुंबई - आशिया इलेव्हन आणि विश्व इलेव्हन यांच्यातील लढत अहमदाबाद येथे तयार होत असलेल्या जगातील सर्वात मोठ्या स्टेडियमवर खेळवण्यात येणार होती. पण, या सामन्याच्या यजमानपदावरून भारतीय नियामक क्रिकेट मंडळाने माघार घेतली आहे. दरम्यान, हा सामना मार्चमध्ये होणार होता. पण, स्टेडियमचे काम मार्चपर्यंत काम पूर्ण होणार नसल्याने, बीसीसीआयने हा निर्णय घेतला आहे. बीसीसीआयच्या निर्णयामुळे हा सामना बांगलादेशच्या शेर-ए-बांगला मिरपूर स्टेडियममध्ये खेळवण्यात येणार आहे.
बांगलादेशचे राष्ट्रपिता शेख मुजिबूर रेहमान यांच्या जन्मशताब्दी वर्षांनिमित्त मार्च महिन्यात दोन टी-२० सामन्यांचे आयोजन करण्यात आले आहे. आशिया इलेव्हन आणि विश्व इलेव्हन संघात हे सामने होणार असून या सामन्याला आयसीसीने अधिकृत दर्जा द्यावा, अशी विनंती 'बीसीबी'ने केली आहे. दोनही सामने सुरूवातीला बांगलादेशमध्ये खेळवण्यात येणार होते. काही दिवसांनी, यातील एक सामन्याचे यजमानपद बीसीसीआय भूषवणार असल्याचे जाहीर करण्यात आले.
उभय संघातील सामन्याचे आयोजन अहमदाबाद येथे उभारले जात असलेल्या जगातील सर्वात मोठे क्रिकेट स्टेडियममध्ये करणार असल्याचे बीसीसीआयने सांगितले होते. दरम्यान, बीसीसीआयने आता मार्चपर्यंत सरदार पटेल स्टेडियमचे काम पूर्ण होणार नसल्याने, सामन्याच्या यजमानपदावरुन माघार घेतली आहे.
आशियाई संघात पाकिस्तानी खेळाडू नको - बीसीसीआय
बांगलादेश क्रिकेट बोर्डाने विराट कोहली, महेंद्रसिंह धोनी, रोहित शर्मा, जसप्रीत बुमराह आणि हार्दिक पांड्या या खेळाडूंना आशिया इलेव्हन संघातून खेळण्यासाठी उपलब्ध करून द्यावी, अशी विनंती केली आहे. तसेच बांगला बोर्डाने पाकिस्तान क्रिकेट बोर्डालाही खेळाडू मागितले होते. तेव्हा बीसीसीआयने भारत आणि पाकिस्तानचे खेळाडू आशियाई एकादश संघाकडून एकत्रित खेळणार नाहीत, असा पावित्रा घेतलेला आहे. विश्व इलेव्हन संघात ऑस्ट्रेलिया, इंग्लंड, दक्षिण आफ्रिका, न्यूझीलंड, वेस्ट इंडिया देशाचे खेळाडू खेळणार आहेत.
हेही वाचा - IND VS NZ : टीम इंडिया 'मिशन न्यूझीलंड'साठी सज्ज, बीसीसीआयने शेअर केले फोटो
हेही वाचा - तुझ्या डोक्यावर जेवढे केस नाहीत, त्यापेक्षा जास्त पैसा आहे माझ्याकडे; शोएबचा वीरुवर पलटवार
