लंडन - आयसीसी विश्वकरंडकात गुरुवारी खेळल्या गेलेल्या सामन्यात ऑस्ट्रेलियाने बांग्लादेशवर ४८ धावांनी विजय मिळवला. या विजयासह ऑस्ट्रेलियन संघाने विश्वकरंडकाच्या सध्याच्या गुणतालिकेत अव्वल स्थान पटकावले आहे. कागारुंनी आतापर्यंत झालेल्या ६ सामन्यांपैकी ५ सामन्यांमध्ये विजय मिळवत सर्वाधिक १० गुणांसह प्रथम क्रमांक मिळवला आहे.
विश्वकरंडक स्पर्धेत आतापर्यंत अपराजित राहिलेला न्यूझीलंडचा संघ ९ गुणांसह दुसऱ्या स्थानी आहे. तर यजमान इंग्लंडच्या संघाकडे ८ तर भारताच्या खात्यात ७ गुण आहेत. गुणतालिकेत दोन्ही संघ अनुक्रमे तिसऱ्या आणि चौथ्या स्थानी आहे. भारत आणि न्यूझीलंडच्या संघाने आतापर्यंत एकही सामना गमावला नाहीय तर ऑस्ट्रेलिया आणि इंग्लंड संघाला प्रत्येकी १-१ सामन्यात पराभवास सामोरे जावे लागले आहे.
