पोर्ट ऑफ स्पेन, त्रिनिदाद - वेस्ट इंडीजचा संघ मंगळवारी इंग्लंड दौऱ्यावर जाणार आहे. पण या दौऱ्यातून डेरेन ब्राव्हो, शिमरोन हेटमायर आणि किमो पॉल या महत्वाच्या तीन खेळाडूंनी माघार घेतली आहे. त्यांनी कौटुंबिक चिंतेमुळे कोरोना महामारीत इंग्लंड दौरा करण्यास नकार दिला आहे.
वेस्ट इंडीज आणि इंग्लंड संघात ८ जुलैपासून तीन कसोटी सामन्यांची मालिका खेळवण्यात येणार आहे. या मालिकेसाठी २५ सदस्यांचा विंडीजचा संघ मंगळवारी इंग्लंडमध्ये दाखल होणार आहे. पण, या मालिकेतून डेरेन ब्राव्हो, शिमरोन हेटमायर आणि किमो पॉल यांनी ऐनवेळी माघार घेतली आहे.
क्रिकेट वेस्ट इंडीजचे सीईओ जॉनी ग्रेव्ह यांनी सांगितले की, 'तिघेही तिन्ही प्रकारच्या क्रिकेटसाठी करारबद्ध आहेत. बोर्ड त्यांच्या भावना समजू शकते आणि त्यांच्यासोबत आमची सहानुभूती आहे. किमो पॉल हा संपूर्ण मोठ्या कुटुंबाचा एकमेव कर्ता पुरुष आहे. तो खरोखर फार चिंताग्रस्त होता. मला काही झाले तर कुटुंबाचे काय होईल, अशी त्याची चिंता आहे. पॉलने बोर्डाला ई-मेल पाठवून इंग्लंड दौऱ्यातून वगळण्याची विनंती केलेली आहे.'
ब्राव्हो हा देखील कोरोनामुळे निर्माण झालेल्या स्थितीमुळे चिंताग्रस्त आहे. इंग्लंडमध्ये जवळपास तीन लाख कोरोनाबाधित लोक पाहून मी आपल्या कुटुंबापासून दूर जाऊ शकत नाही, असे ब्राव्होचे मत आहे.
दरम्यान, विंडीजविरुद्धची कसोटी मालिका जैव सुरक्षित वातावरणात खेळली जाणार असल्याने कुठलाही संभाव्य धोका टाळता येईल, असा विश्वास इंग्लंड क्रिकेट बोर्डाचे संचालक स्टीव्ह एलवर्दी यांनी व्यक्त केला आहे.
हेही वाचा - वर्णद्वेषाबाबत आयसीसीने व्हिडीओ पोस्ट करत व्यक्त केली प्रतिक्रिया
हेही वाचा - जातीवाचक शेरेबाजी प्रकरण : पोलिसात गुन्हा दाखल झाल्यानंतर युवराज म्हणाला...
