मुंबई - कोरोनाचा विळखा दिवसागणिक घट्ट होताना दिसत आहे. जगभरात यामुळे भीतीचे वातावरण आहे. भारतात कोरोनावर नियंत्रण मिळवण्यासाठी, पंतप्रधान नरेंद्र मोदींनी संपूर्ण देश २१ दिवसांसाठी लॉकडाऊनची घोषणा केली आहे. या आवाहनासोबत मोदींनी कोरोनाविरुद्धच्या लढ्यासाठी सढळ हाताने मदत करा, असे आवाहनही केले आहे. मोदींच्या या आवाहनाला सर्व क्षेत्रातून प्रतिसाद मिळत आहे. भारतीय क्रिकेटपटू रवींद्र जडेजाची पत्नी रिवाबा जाडेजा हिनेदेखील कोरोनाग्रस्तांना मदत केली आहे. याशिवाय हॉकी इंडियानेही मदतीचा हात पुढे केला आहे.
रिवाबा जडेजा हिने कोरोनाग्रस्तांसाठी २१ लाखांची मदत केली आहे. त्यासोबत तिने, नागरिकांना घरात राहण्याचे आवाहन देखील केले आहे. रिवाबाने ही मदत पंतप्रधान निधीमध्ये जमा केली आहे.
हॉकी इंडिया ही कोरोनाग्रस्तासाठी पुढे आली आहे. त्यांनी २५ लाखांचा निधी जाहीर केला आहे. दरम्यान, याआधी अनेक कलाकार, व्यापारी मंडळी, उद्योगपती, क्रीडापटू, संस्था आणि सर्वसाधारण जनता मदतीसाठी पुढे सरसावली आहे.
या खेळाडूंनी केली मदत
- गौतम गंभीर - १.५ कोटी
- रोहित शर्मा - एकूण ८० लाख
- सुरेश रैना - ५२ लाख
- सौरव गांगुली - ५० लाख
- सचिन तेंडुलकर - ५० लाख
- अजिंक्य रहाणे - १० लाख
- मुंबई क्रिकेट असोसिएशन - १ कोटी
- बीसीसीआय - ५१ कोटी
- युसूफ व इरफान पठाण - ४००० मास्क
- याशिवाय बजरंग पुनिया, मेरी कोम, इशा सिंह, महिला क्रिकेटपटू मिताली राज, पूनम यादव, दीप्ती शर्मा यांनीही मदत दिली आहे.
भारतीय संघाचा कर्णधार विराट कोहली आणि तिची बॉलीवूड अभिनेत्री पत्नी अनुष्का शर्मा यांनीही मदत दिली आहे. पण या जोडीने किती रक्कम दिली, याची माहिती उघड झालेली नाही. माध्यमांनी दिलेल्या वृत्तानुसार विरुष्का जोडीने ३ कोटी रुपयांची मदत दिली आहे.
हेही वाचा - ग्रँडमास्टर लेव्हॉनची पत्नी अरियानीचे अपघाती निधन
हेही वाचा - युवराज म्हणाला, गांगुलीने प्रोत्साहन दिलं पण धोनी आणि विराटने 'सपोर्ट' केला नाही
