मुंबई - ऑस्ट्रेलिया क्रिकेट संघाचे माजी खेळाडू आणि प्रसिद्ध आंतरराष्ट्रीय क्रिकेट समालोचक डीन जोन्स यांचे निधन झाले आहे. डीन यांना मुंबईमध्ये हृदयविकाराचा तीव्र झटका आला आणि यात त्यांचे निधन झाले. ते ५९ वर्षांचे होते. दरम्यान, त्यांच्या अकाली निधनाने क्रिकेट विश्वात शोककळा पसरली आहे.
सध्या यूएईमध्ये सुरू असलेल्या इंडियन प्रिमियर लीगसाठी समालोचक म्हणून त्यांनी करार केला होता. त्याच पार्श्वभूमीवर ते मुंबईत आले होते. मुंबईत त्यांना हृदयविकाराचा तीव्र झटका आला आणि यात त्यांचे निधन झाले.
डीन जोन्स यांचा जन्म मेलबर्न येथे झाला होता. त्यांनी ऑस्ट्रेलियाकडून ५२ कसोटी सामने खेळली आहेत. यात त्यांनी ४६.५५च्या सरासरीने ३ हजार ६३१ धावा केल्या आहेत. त्यामध्ये २१६ ही त्यांची सर्वाधिक धावसंख्या आहेत. यात ११ शतकांचा समावेश आहे. जोन्स यांनी १६४ एकदिवसीय सामन्यात ऑस्ट्रेलियाचे प्रतिनिधीत्व केले आहे. यात त्यांनी ४४.६१च्या सरासरीने सात शतकं आणि ४६ अर्धशतकांसह ६ हजार ६८ धावा केल्या आहेत.
जोन्स हे रनिंग बिटविन विकेटमध्ये कुशल मानले जात होते. ते अंत्यत चपळाईने सिंगल-डबल धावा घेत स्ट्राइट रोटेड करत असत. क्षेत्ररक्षणामध्ये जोन्स यांनी कसोटीत ३४ तर एकदिवसीय क्रिकेटमध्ये ५४ कॅचेस घेतल्या आहेत.
जोन्स यांच्या निधनावर भारतीय संघाचा माजी फलंदाज विरेंद्र सेहवागने ट्विटरवर पोस्ट करून श्रद्धांजली वाहिली आहे. डीन हे माझे सर्वात आवडते समालोचक होते, त्यांच्या अकाली निधनाने मला अतिशय दु: ख झाले आहे. त्यांच्यासोबतच्या अनेक आठवणी असून त्यांच्या निधनाच्या बातमीवर अद्यापही विश्वास बसत नसल्याचे सेहवागने म्हटलं आहे.
महाराष्ट्राचे राज्यपाल भगतसिंह कोश्यारी यांनीही डीन जोन्स यांच्या निधनाबद्दल दुःख व्यक्त केले आहे. ऑस्ट्रेलियाचे प्रसिद्ध क्रिकेटपटू व समालोचक डीन जोन्स यांचे मुंबई येथे आकस्मिक निधन झाल्याचे समजले, तेव्हा अतिशय वाईट वाटले. दिवंगत आत्म्याला शांती लाभो, ही प्रार्थना करतो, असे राज्यपालांनी आपल्या शोक संदेशात म्हटलं आहे.
