मुंबई - 'छिन्न', 'इमला', 'रज्जू', 'चौकोन' यासारख्या पुरस्कारप्राप्त नाटकाचे लेखक, आणि 'कन्स्ट्रक्शन', 'पिदी', 'मी घोडा हुसेनच्या चित्रातला', 'रायाची रापी', अशा एकांकीकांचे लेखक वामन तावडे यांचे मंगळवारी दीर्घ आजाराने मुलुंडमध्ये निधन झाले.
गेल्या चार दिवसांपासून छातीत दुखत असल्याने त्यांना मुलुंडमधील एका खासगी रुग्णालयात उपचारासाठी दाखल करण्यात आले होते. मात्र मंगळवारी संध्याकाळी साडे आठ वाजता वयाच्या ६९ व्या वर्षी त्यांची प्राणज्योत मावळली. त्यांच्या पश्चात पत्नी, कन्या, जावई आणि नात, असा परिवार आहे. त्यांच्या जाण्याने एक सिद्धहस्त लेखक आपल्यातून निघून गेल्याची भावना नाट्यवर्तुळातून व्यक्त होत आहे.
वामन तावडे यांचे पार्थिव मुलुंड पूर्व येथील त्यांच्या राहत्या घरी काही काळ अंत्यदर्शनासाठी ठेवण्यात आले असून आज सकाळी १० वाजता मुलुंड पूर्वेकडील टाटा कॉलनी जवळील स्मशानभूमीत त्यांच्या पार्थिवावर अंत्यसंस्कार करण्यात येतील. तावडे यांच्या 'रज्जू' या नाटकाद्वारे अभिनेत्री स्मिता पाटील यांनी मराठी रंगभूमीवर पदार्पण केले होते. त्यानंतर काही वर्षांनी हीच भूमिका अभिनेत्री लीना भागवत यांनीही साकारली होती. तर त्यांच्या 'तुम्ही आम्ही' या नाटकातून दलित चळवळीवर भाष्य करण्यात आले होते.
