मुंबई - बॉलिवूड कलाकारांना आपल्या कॅमेऱ्यात कैद करण्यासाठी पॅपाराझींची नेहमीच झुंड उडते. कधी कधी कलाकारांभोवती जमलेल्या गर्दीतून वाट काढत हे छायाचित्रकार मागे पुढे न पाहता त्यांचे फोटो काढताना दिसतात. अभिनेत्री जान्हवी कपूरचीही सध्या बरीच क्रेझ आहे. मात्र, तिची झलक टिपत असताना एक छायाचित्रकार थोडक्यात बचावला आहे.
जान्हवी कपूरला अलिकेडच जुहू परिसरात स्पॉट करण्यात आले. यावेळी बरेच छायाचित्रकार तिचे फोटो काढण्यासाठी आले होते. यापैकी एक छायाचित्रकार समोर आला आणि तिचा फोटो काढण्याच्या नादात त्याचे मागून येणाऱ्या ऑटोरिक्षाकडे लक्ष नव्हते. तो मागे सरकला तेवढ्यात ऑटोरिक्षाचा त्याला धक्का लागला. सुदैवाने जान्हवीच्या बॉडीगार्डने त्याला सावरले. त्यामुळे मोठा अपघात झाला नाही.
हे पाहून जान्हवीलाही धक्का बसला होता. तिला काय करावे हे सुचले नाही. त्यामुळे ती जागेवरच स्तब्ध झाली होती. तिने त्या छायाचित्रकाराला काही लागले का असं विचारलं. तो ठिक आहे हे पाहून ती पुढे जाऊन कारमध्ये बसली.
वर्कफ्रंटबाबत सांगायचं तर, जान्हवी लवकरच गुंजन सक्सेना यांच्या जीवनावर आधारित 'कारगिल गर्ल' या चित्रपटात दिसणार आहे. शरन शर्मा यांनी या चित्रपटाचे दिग्दर्शन केले आहे. १३ मार्चला हा चित्रपट प्रदर्शित होणार आहे.
