'सलमान खान-लॉरेन्स बिश्नोईवर गाणं लिहिणाऱ्याला महिनाभरात मारलं जाईल', अभिनेत्याला आणखी एक धमकी

अभिनेता सलमान खानला पुन्हा एकदा लॉरेन्स बिश्नोई गॅंगकडून धमकीचा मेसेज आला आहे. यावेळी मुंबईतील ट्रॅफिक पोलीस कंट्रोल रूमला हा धमकीचा मेसेज प्राप्त झालाय.

मुंबई : कधी सलमान खान तर कधी शाहरुख खान या दोन्ही अभिनेत्यांना जीवे मारण्यासाठी येणाऱ्या धमकीचं सत्र थांबता थांबत नाहीये. शाहरुख खान पाठोपाठ आता सलमान खानला (Threat Message For Salman Khan) पुन्हा एकदा लॉरेन्स बिष्णोई गॅंगकडून (Lawrence Bishnoi Gang) धमकीचा संदेश आला आहे. मुंबईच्या ट्रॅफिक पोलीस कंट्रोल रूमला गुरुवारी रात्री बारा वाजता हा संदेश प्राप्त झाला आहे.

पुन्हा गाणं लिहू शकणार नाही : अभिनेता सलमान खानला बिष्णोई गँगकडून पुन्हा एकदा धमकीचा संदेश प्राप्त झालाय. गुरुवारी रात्री बारा वाजता मुंबई ट्रॅफिक पोलीस कंट्रोल रूमला सलमान खानला धमकीचा एक संदेश प्राप्त झाला. सलमान खान आणि लॉरेन्स बिष्णोई यांच्यावर एक गाणं लिहिण्यात आलंय. मात्र, हे गाणं लिहिणाऱ्याला सोडलं जाणार नाही, अशी धमकी मेसेजमध्ये देण्यात आली आहे. धमकीच्या मेसेजमध्ये म्हटलंय की, "एका महिन्याच्या आत ज्यानं हे गाणं लिहिलंय त्याला ठार मारण्यात येईल. त्याची अवस्था इतकी वाईट केली जाईल की तो पुन्हा आपल्या नावानं गाणं लिहू शकणार नाही. जर सलमान खान मध्ये हिम्मत असेल तर त्यानं हे गाणं लिहिणाऱ्याला वाचवावं."

धमकी देणाऱ्याचा शोध सुरू : अशाच प्रकारची धमकी गुरुवारी (7 नोव्हेंबर) अभिनेता शाहरुख खान याला देण्यात आली होती. त्यानंतर सलमान खानला पुन्हा एकदा धमकीचा मेसेज पाठवण्यात आला आहे. याप्रकरणी मुंबई वरळी पोलीस ठाण्यात अज्ञाताविरोधात गुन्हा दाखल करण्यात आलाय. तसंच वरळी पोलीस या संपूर्ण प्रकरणाची चौकशी करत असून धमकीचा मेसेज पाठवणाऱ्याचा शोध घेतला जात आहे.

हेही वाचा -