आपल्या पहाडी आवाजाने संगीतरसिकांच्या मनात आपले स्थान निर्माण करणारे गायक कैलाश खेर हे हिंदी चित्रपट संगीतक्षेत्रातील प्रतिष्ठित नाव आहे. त्यांनी गायलेल्या ‘अंदाज’ चित्रपटामधील गाण्याने ते नावारूपास आहे. त्यानंतर स्वदेस, मंगल पांडे, सरकार इत्यादी चित्रपटांमध्ये पार्श्वगायन करून त्यांनी अजूनही प्रसिद्धी मिळविली. कैलाश खेर यांना २००७ सालचा सर्वोत्तम पुरुष पार्श्वगायकासाठीचा फिल्मफेअर पुरस्कार मिळाला आहे.
हाच पहाडी आवाज आता मराठी मालिका ‘गाथा नवनाथांची' मधून दुमदुमणार आहे. या मालिकेचे शीर्षकगीत गुरू ठाकूर यांनी लिहिले असून पंकज पडघण यांनी संगीतबद्ध केले आहे. प्रख्यात गायक कैलाश खेर यांच्या आवाजात हे शीर्षकगीत प्रेक्षकांना रोज ऐकायला मिळणार आहे. नवनाथांचा महिमा आणि त्यांची ख्याती या मालिकेबरोबरच या शीर्षगीतामुळेसुद्धा लोकांपर्यंत पोचणार आहे.
टेलिव्हिजनच्या इतिहासात पहिल्यांदाच सोनी मराठी वाहिनी नवनाथांवर मालिका घेऊन येत आहे. कलियुगात जेव्हा मनुष्यावर असुरी शक्ती वरचढ होऊ लागली, तेव्हा मनुष्यकल्याणासाठी नवनारायणांनी नवनाथांच्या रूपात अवतार घेतला. 'गाथा नवनाथांची' आत्तापर्यंत गोष्टींच्या स्वरूपात वाचलेल्या किंवा ऐकलेल्या कथा प्रेक्षकांना या मालिकेतून दृश्य स्वरूपात पाहायला मिळणार आहेत. या मालिकेतून नवनाथांचा महिमा महाराष्ट्राच्या घराघरांत पोचणार आहे.
'गाथा नवनाथांची' ही मालिका २१ जूनपासून सोनी मराठी वाहिनीवर प्रेक्षकांच्या भेटीला येणार आहे.
