मुंबई - बॉलिवूडचे आघाडीचे दिग्दर्शक सुभाष घई यांच्यावर चित्रपटाची कथा चोरल्याच्या आरोपावरून गुन्हा दाखल करण्यात आला होता. औरंगाबाद शहरातील लेखक मुश्ताक मोसीन मुबारक हुसेन सिद्दीकी यांनी त्यांच्याविरोधात तक्रार दाखल केली होती. मात्र, जिल्हा व सत्र न्यायालयाने सुभाष घईंविरोधीतील हा गुन्हा रद्द केला आहे.
औरंगाबाद शहरातील लेखक मुश्ताक मोसीन मुबारक हुसेन सिद्दीकी यांनी १९८३ साली 'श्रीमती' या नावाने कथा लिहिली होती. त्यांनी ही कथा दिगदर्शक प्रकाश मेहरा यांना देखील सांगितली होती. मात्र २० जुलै २००९ मध्ये 'पेइंग गेस्ट' नावाचा चित्रपटात आपल्याच कथेचा वापर करण्यात आला असल्याचा आरोप मुश्ताक यांनी केला होता.
त्यानुसार जिल्हा व सत्र न्यायालयाने सुभाष घई यांच्या विरोधात प्रोसेस इश्यू करण्याचे आदेश दिले होते. ११ एप्रिल २०१८ रोजी यावर सुनावणी घेण्यात आली. सुनावणी दरम्यान सुभाष घई यांच्या वकिलाने काही बाबी न्यायालयाच्या लक्षात आणून दिल्या. मुश्ताक मोसीन मुबारक हुसैन सिद्दीकी यांनी आपले कथानक फिल्म रायटर अशोसीएशनकडे नोंदणी केली असली तरी 'कॉपी राईट अॅक्ट' खाली कुठलीही नोंद केलेली नाही. इतकेच नाही तर, संबंधित कथा प्रकाश मेहता यांनी फिल्म रायटर असोसिएशन कडून कराराद्वारे विकत घेतली आहे, असा युक्तिवाद केला. त्यानंतर न्यायालयानी सुभाष घई यांच्याविरोधात दाखल झालेला गुन्हा रद्द केला.
